ASNN – Federata Shqiptare e Futbollit (FSHF) ka përmbyllur me sukses edicionin e 5-të të kursit për trajnerin e përgatitjes atletike. Ky kurs, që nisi më datë 27 prill 2021 dhe që përfundoi më 28 maj 2021, u zhvillua nën kujdesin e stafit të përgatitësve atletikë në Sektorin e Edukimit në FSHF, Luixhi Febrari, Luka Laurenti, Iris Selimi, por edhe ekspertë të tjerë të fushës nga Shqipëria dhe jashtë saj. Në këtë kurs u përfshinë 30 lektorë të huaj, ndër të cilët emra të njohur si Ferreto Ferreti, Francesko Perondi, Roberto Sasi, Xhanluka Stesina, Karlo Kruz, etj.
Ditën e premte, janë shpërndarë diplomat për pjesëmarrësit, të cilët ishin pjesë e këtij kursi që u zhvillua edhe përmes platformave online, për shkak të kushteve të imponuara nga epidemia e “Covid-19”. Në ceremoninë e zhvilluar në mjediset e Stadiumit “Arena Kombëtare” morën pjesë stafi i përgatitësve atletikë, me në krye Luixhi Febrarin, Drejtori Teknik i FSHF-së, Xhankarlo Kamoleze, por edhe stafi i ekipit Kombëtar, duke nisur nga trajneri Edoardo Reja dhe zëvendëstrajnerët Serxhio Porrini, Hamdi Salihi dhe Ervin Bulku.
Gjatë shpërndarjes së diplomave, trajneri Reja vlerësoi punën e mirë të bërë nga Federata e Futbollit në këtë drejtim, duke theksuar se përgatitësi atletik është një nga figurat më të rëndësishme për një ekip. Ai i uroi suksese të sapodiplomuarve në këtë fushë. Gjithashtu, edhe përgatitësi atletik i Kombëtares, Luixhi Febrari, u shpreh i kënaqur për mbështetjen e FSHF-së dhe hapësirat që ka krijuar për të zhvilluar kurse të tilla. Febrari theksoi se edhe nga ana e pjesëmarrësve ka pasur mjaft interes, si dhe u uroi suksese në këtë fushë. Kjo nuk ishte hera e parë që FSHF-ja organizon një kurs të tillë.
Sipas rregullores së re të FSHF-së, klubet e Kategorisë Superiore e kanë tashmë të detyrueshme praninë e një përgatitësi atletik në stafet e tyre.
