ASNN – Mbyllet edicioni i radhës i kursit UEFA C në Tiranë, diplomohen me sukses 40 trajnerë të rinj. Kështu, Kursi për trajnerët e licencës UEFA C, i organizuar nga Federata Shqiptare e Futbollit (FSHF), ka përmbyllur me sukses një tjetër edicion në zonën e Tiranës. Ky kurs u udhëhoq nga drejtues të Sektorit të Edukimit në FSHF, të cilët kanë organizuar dhe janë kujdesuar për mbarëvajtjen e këtij programi për formimin e profesionistëve të rinj të trajningut.
Në mjediset e “Shtëpisë së Futbollit”, siç njihet ndryshe selia e FSHF-së në kryeqytet, u zhvillua edhe ceremonia e diplomimit, ku morën licencën e UEFA C plot 40 kursantë, ndër të cilët edhe 5 femra. E veçantë ishte se një ndër kursantët e diplomuar ishte Armand Gjoka, i cili është pjesë e Kombëtares shqiptare të amputuarve. Kursi i licencës UEFA C është i bazuar në 4 shtylla kryesore që janë: trajneri, lojtari, ndeshja dhe mjedisi.
Ndërkohë, kjo licencë është edhe baza e trajningut prej nga ku nis edhe rrugëtimi për t’u bërë trajner profesionist. Të gjithë të diplomuarit që tashmë janë pajisur me licencën UEFA C mund të ushtrojnë profesionin e trajnerit në futbollin amator dhe mund të punojnë si zëvendës-trajnerë me ekipet e moshave që marrin pjesë në kampionatet e të gjitha niveleve të organizuara nga FSHF në vend.
