ASNN – Federata Shqiptare e Futbollit do të organizojë në datat 25-28 janar kursin e formimit të fizioterapistëve “Human Tecar”. Ky kurs, që do të zhvillohet në mjediset e Federatës në kryeqytet, do të ketë lektorë të fushës së mjekësisë sportive siç janë: drejtuesi i Departamentit të Mjekësisë Sportive në FSHF, Xhanluka Stesina, Ilvi Begolli, i cili është fizioterapist pranë FSHF-së, Arzen Voci, fizioterapist i Kombëtares A të futbollit, si dhe specialisti i “Tecarterapia”, Françesko Fasino. Kursi do të jetë i ndarë në dy pjesë: pjesë teorike dhe më pas do të vijojë me pjesën praktike.
Në pjesën teorike, fillimisht do të bëhet një hyrje dhe prezantim i kursit “Human Tecar”, dhe më pas do të vijohet me përdorimin e “TECAR”, përdorimin e modaliteteve “rezistiv dhe capacitiv”, anatominë muskulare dhe tendinat, fiziologjinë dhe biomekanikën e sportistit në futboll, fizpatologjinë e dëmtimeve mio-tendinoze, dëmtimet kryesore muskulare e tendinoze, trajtimin fizioterapeutik të dëmtimeve në sport, trajtimin me tecarterapi në bazë të modaliteteve rezistiv dhe capacitiv të dëmtimeve në sport.
Ndërsa në datat 27-28 janar, kursi do të jetë i hapur për të gjithë studentët, mjekët, fizioterapistët dhe për të gjithë ata që duan të dinë për aplikimin e Tecarterapisë. Numri maksimal i personave që mund të marrin pjesë është 20. Në fund të kursit, pjesëmarrësit do të pajisën me certifikatë nga FSHF dhe “Human Tecar Italia”. Për të gjithë personat e interesuar të cilët duan të regjistrohen në këtë kurs, Federata Shqiptare e Futbollit ka njoftuar se format e komunikimit janë si më poshtë:
E-mail: drejtoria.teknike@fshf.al
Nr. tel: +355 68 404 0033
