ASNN – “Jemi njohur dje me vendimin e argumentuar të ardhur nga UEFA dhe menjëherë kemi nisur punën për të përgatitur materialin për në Komisionin e Apelit.” Kështu ka deklaruar të shtunën juristi i FSHF-së, Envi Hicka, e ka cilësuar si kontradiktor vendimin dhe arsyetimin e parashtruar nga organizmi që qeveris futbollin evropian, për ndeshjen e ndërprerë të 14 tetorit me Serbinë.

“Shpresojmë shumë, që në Apel, argumentat tona të dëgjohen dhe vendimi të ndryshojë në favorin tonë”, – ka theksuar ai. Të premten pasdite ka mbërritur në FSHF argumentimi i plotë prej 12 faqesh i Disiplinës pranë UEFA-s, që vendosi për t’ia dhënë Serbisë fitoren në tavolinë, me rezultatin 3-0, për ndeshjen e ndërprerë të 14 tetorit.

Për këtë arsye, organizmi që qeveris futbollin shqiptar ka dalë të shtunën në një konferencë për shtyp, ku juristi Envi Hicka e ka cilësuar si kontradiktor vendimin dhe arsyetimin e tij. Përfaqësuesi ligjor i FSHF-së ka theksuar se Kombëtarja kuqezi nuk ka refuzuar të luajë dhe se gjoba është e pavend.

Hicka përsëriti qëndrimi zyrtar se FSHF-ja e ka bërë të qartë se çështjen në fjalë do ta dërgojë deri në KAS, në Lozanë të Zvicrës.