ASNN – Komisioni i Etikës pranë Federatës Shqiptare të Futbollit ka ndëshkuar sot 3 futbollistë të ekipeve të Kategorisë Superiore për komplotim në influencimin e rezultatit të ndeshjeve. Më konkretisht, Etika ka dënuar sot portierin e Flamurtarit, Ilion Likën për tolerim të dy ndeshjeve të kampionatit shqiptar, atë ndaj Partizanit dhe atë ndaj Kukësit.
Po kështu, me të njëjtin motivacion është ndëshkuar futbollisti i Partizanit, Arben Muskaj, për ndeshjen ndaj Laçit, si dhe futbollisti i Elbasanit, Ganiol Kaçuli, për ndeshjen ndaj Partizanit. Të 3 këta futbollistë janë dënuar me nga 6 muaj pezullim nga të gjitha veprimtaritë.
Duhet theksuar se, më 11 shkurt të këtij viti, për të njëjtën akuzë, Etika ka dënuar edhe dy futbollistët, Arjan Pisha i Elbasanit dhe Alfred Osmani i Teutës. Sipas Komisionit të Etikës, Pisha është komplotuesi i 3 ndeshjeve, madje për këtë futbollist është depozituar edhe një kallëzim penal në Prokurori.
Ndërkohë, Etika pati ndëshkuar edhe gardianin e portës durrsake, Osmani, i cili akuzohet se toleroi ndaj Flamurtarit në Vlorë, ndeshja që përfundoi 2-1 për vlonjatët në atë shfaqje të shëmtuar në minutat e fundit.
