ASNN – Presidenti i Federatës Shqiptare të Futbollit, Armand Duka, ishte i ftuar të dielën në mbrëmje në emisionin “Sport News Plus”, në televizionin informativ shqiptar “News 24”, ku ai foli, ndër të tjera, për bashkëpunimin me qeverinë, si dhe çështjen e tamponëve. “Nuk ka munguar nga ana jonë”, – ka theksuar ai, i pyetur për bashkëpunimin me qeverinë.
“Ne jemi gjithmonë bashkëpunues me çdo faktor që ndihmon lojën e futbollit, – ka theksuar kreu i organizmit që qeveris futbollin në vend. Qeveria jo vetëm që nuk e mbështeti futbollin, por edhe e injoroi. – Çdo shqiptar dhe politikan është krenuar me rezultatet e futbollit dhe nuk duhet ta injorojnë në atë mënyrë. Më vjen keq që nuk u kthye në një reflektim ekonomik.”
“Sidoqoftë, uroj që të ketë qenë një pasojë e virusit dhe të ketë kaluar edhe kjo”, – ka shtuar Duka, i cili më tej ka folur edhe për paketën e solidaritet. “Qeveria duhet të trajtonte njerëzit e futbollit në të njëjtën mënyrë, – ka këmbëngulur ai. – Ne kemi mbështetur me 2 paga solidariteti me ato mundësi minimale, për t’iu treguar solidaritet njerëzve tanë.”
“Edhe vetë klubet janë treguar solidarë dhe bashkëpunues, – ka vijuar kreu i FSHF-së. Nëse themi që ka mbaruar, mendoj që kemi qenë goxha të bashkuar.” Ai ka folur edhe për çështjen e testeve shëndetësore. “Për sa u përket tamponëve, nuk është se nuk kemi dashur ne, – ka sqaruar 57-vjeçari. – Kështu është arsyetuar, kështu është gjykuar nga Ministria e Shëndetësisë.”
“Tamponë do bëhet vetëm kur futbollistët të jenë me temperaturë ose të shfaqin simptomat e “Covid-19”, – ka vijuar ai. – Nuk është se ne e kemi shmangur. Jeta e njeriut është më e rëndësishme. Nuk jemi rikthyer në kampionat thjesht për klasifikim, sepse ai ekzistonte. Është i rëndësishëm diskutimi për mbrojtjen e shëndetit të njerëzimit. Kam dëgjuar se protokollet janë të pamundura.”
“Janë të gjitha të mundura. Nëse kemi vullnet dhe dëshirë është i zbatueshëm. Duhet minimizuar dhe eliminuar çdo lloj rreziku”, – ka përfunduar Presidenti i Federatës Shqiptare të Futbollit, Armand Duka, duke folur për rikthimin e futbollit.
