ASNN – Presidenti i Federatës Shqiptare të Futbollit, Armand Duka, ishte i ftuar të dielën në mbrëmje në emisionin “Sport News Plus”, në televizionin informativ shqiptar “News 24”, ku ai foli, ndër të tjera, problematikat e klubeve, kontratat e lojtarëve dhe investimet. Sa u përket problematikave të klubeve, ai pohoi se klubet shqiptare nuk janë në një situatë solide financiare. “Ne jemi dëshmitarë që klubet kalojnë në situata shumë të vështira”, – tha Duka.

“Apo siç ndodhi së fundmi me Vllazninë, apo qoftë dhe ndonjë klub tjetër, – vijoi ai. – Ajo që ne duhet të bëjmë është të zbatojmë ligjin dhe kriteret e licencimit. Nëse ne respektojmë ato, mund të parandalojmë raste të tilla. Nuk ekziston përvoja për buxhete të ngrira. Klubi është i detyruar të paguajë futbollistët sipas kontratat. Në të gjitha rastet problemet janë zgjidhur nga Dhoma e Zgjidhjes së Konflikteve. Këto janë përvojat e futbollit.”

Lidhur me çështjen e kontratave të futbollistëve në këtë sezon të zgjatur përtej afateve, kreu i organizmit që qeveris futbollin në vend kujtoi se FIFA ka nxjerrë një udhëzues për kohën e pandemisë edhe për marrëdhëniet kontraktuale të klubeve, e cila pak a shumë udhëzon klubet. “Kjo duhet të arrihet nëpërmjet marrëveshjes mes klubeve dhe futbollistëve, – tha ai. – Për sa u përket përfundimit të kontratave, futbollistët janë të detyruar të luajnë deri në përfundim të sezonit, kontrata zgjatet automatikisht.”

“Ne kemi dhënë një mbështetje financiare dhe solidare, – ka vijuar Duka. – Qeveria “pagë luftë” futbollit nuk i dha. Gjithë futbollistët dhe zyrtarët duhet të bisedojnë me klubet. Kjo është një periudhë me të cilën ne nuk duhet të abuzojmë. Të jemi solidarë për të bërë më të mirën e mundshme.” Në mbyllje, Presidenti i Federatës Shqiptare të Futbollit, Armand Duka ka prekur edhe çështjen e investimeve dhe infrastrukturës sportive, duke i parë gjërat në një plan më të gjerë.

“Nuk i kemi prekur buxhetet, – tha ai. – Do të vazhdojmë me të njëjtin ritëm. Ato mungesa të ardhurash apo shpenzime do t’i rikuperojmë vetë pa cënuar projektet e investimeve. Projekti jonë madhor nuk mund të realizohet pa mbështetjen e qeverisë, që janë ndërtimi i fushave. Futbollit shqiptar i mungon infrastruktura e stërvitjes për të gjitha moshat. Duhet të kemi një infrastrukturë të kënaqshme. Çdo njeri, çdo klub, çdo ekip mund të aplikojë për të investuar 1/3 e këtij projekti.”