ASNN – Sërish mosmarrëveshje midis dy pilotëve të “Ferrari”-t, Fetel dhe Lëklerk. Kjo për arsye të strategjisë së zgjedhur nga drejtuesit e skuadrës së kuqe në garën e Soçit. Lëklerku është i pakënaqur me vendimin e drejtuesve për t’i lënë vendin e parë Fetelit. Sidoqoftë, drejtori i përgjithshëm i “Ferrari”-t, Binoto, është munduar ta qetësojë dhe të sqarojë edhe njëherë strategjinë e garës. “Duhet të ishim perfekt, por nuk ia arritëm”, – kështu është shprehur drejtori i përgjithshëm i skuadrës së “Ferrari”-t, italiani Matia Binoto.
“Jemi të hidhëruar se humbëm një makinë, por na inkurajon paraqitja e makinës tjetër që ishte në pistë, – ka vijuar ai. – Shikojmë me besim në garat e ardhshme.” Përsa i përket besueshmërisë së njëvendësheve të kuqe, Binoto përgjigjet: “Këtë vit na ka ndodhur më shumë se një herë të mos ia dalim. Këtë radhë, Sebi pati një problem në motor dhe u detyruam ta ndalim, për arsye sigurie. Megjithatë makinat janë rritur në nivel e kjo është parë në 3 garat e tjera para Soçit.” Kjo ka qenë analiza e garës në Soçi për “Ferrari”-n, fundjavën e kaluar.
Por te skuadra e kuqe, duket se nuk janë sqaruar ende pilotët midis tyre për shkak të strategjisë së ndjekur. Sharl Lëklerku ka kërkuar edhe njëherë sqarime për atë urdhër që iu dha nëpërmjet radios nga drejtuesit në fillim të garës, që t’i hapte rrugë shokut të skuadrës. Gjë që shkaktoi një moment nervozizmi te piloti nga Monako. “Strategjia ishte që t’i hapja rrugën Fetelit dhe të vazhdonim garën, ai i pari e unë i dyti, me qëllim të mbanim prapa Hemiltonin, – ka thënë Lëklerku. – Unë shpresova se pozicioni do të më jepej sërish, por nuk ndodhi kështu.”
“Sebastiani vazhdoi përpara dhe unë kërkova sqarime, – vijoi ai. – Megjithatë ndërrimi i vendeve ndodhi pas ndalesës”. Ndërsa Fetel, është habitur nga pyetjet e vazhdueshme të shokut të tij të skuadrës. “Me Lëklerkun kishim një marrëveshje që në fillim të garës. Gjithçka ishte e qartë. Ndoshta unë nuk kam kuptuar ndonjë gjë. Megjithatë, do flasim sërish”, – ka thënë piloti gjerman. Situatën ka provuar ta sqarojë edhe drejtori i përgjithshëm i “Ferrari”-t, Matia Binoto, i cili thotë: “Urdhëri në radio? Po. Ne i kërkuam Sharlit t’i hapte rrugën Sebit dhe ai e bëri.”
“Gjermani ishte më i shpejtë, e të qëndronte Sharli i pari ishte e gabuar. Ndoshta nuk ishim shumë të qartë në radio? Do të jemi radhën tjetër?”- ka përfunduar Binoto.
