ASNN – “E bujshme” është më e pakta që mund të thuhet, sepse ka ardhur në kuptimin e mirëfilltë të fjalës, “si rrufe në qiell” të hapur. Niko Rosberg ka lajmëruar tërheqjen nga Formula 1.

31-vjeçar gjerman, i cili sapo ka fituar titullin e kampionit të botës në Formula 1 të dielën e shkuar në Abu Dabi, e bëri të ditur një gjë të tillë gjatë festës të FIA-s në Vjenë, ku jepen çmimet e fundit të sezonit.

“Dua që me këtë rast të bëj një lajmërim, kam vendosur që t’i jap fund tani karrierës time në Formulën 1, – ka deklaruar ai. – Është e vështirë për ta shpjeguar, që kur isha 6 vjeç kisha një ëndërr, dhe ishte ajo që të bëhesha “kampion bote” në Formulën 1.”

“Tani e arrita, kam dhënë gjithçka për këtë objektiv për 25 vite dhe me ndihmën e personave që më rrethojnë, me ndihmën e tifozëve, të familjes dhe të shoqërisë time ia arrita t’ia dal këtë vit”, – përfundoi Niko Rosbergu.