ASNN – Drejtori i Motorsportit, optimist se rregullat e reja do të rritin konkurrencën. Një nga drejtusit kryesorë të Formulës 1, Drejtori i Motorsportit, Ros Braun, thotë se ai është “optimist” për ndikimin që makinat e gjeneratës së re do të kenë mbi cilësinë e garimit. Skuadrat kanë zbuluar gradualisht interpretimin e tyre të rregullave të reja teknike, duke ofruar variante shumëngjyrëshe, teksa përgatiten për testet e para për sezonin e ri me makinat e tyre, që do të jenë ato 3-ditore që do të mbahen javën e ardhshme në pistën e Katalonjës në Barcelonë.
Synimi i rregullave të reja është që t’i lejojë makinat ta ndjekin më afër njëra-tjetrën, duke ndihmuar në një garim më intensiv dhe parakalime më të lehta dhe një spektakël më të madh. “Do të duhet pak kohë për t’u përshtatur me rregullat e reja, por mendoj se do të jemi në një pozitë më favorshme sa i përket përparimit me këto makina të reja, në krahasim me ato të vjetrat”, tha Brauni, duke vijuar: “Ka shumë optimizëm për sezonin e ri dhe mendoj se do të shohim disa rezultate interesante këtë vit nga pilotët e ri që kanë ardhur këto sezonet e fundit.”
“Nëse ata kanë makinën e duhur, atëherë ne do të kemi më shumë spektakël në pistë, – ka theksuar ai. – Çdo vendim që është marrë nuk ka synuar frenimin e këtij sporti, përkundrazi, ka synuar që t’u mundësojë të gjitha skuadrave që të arrijnë më tepër dhe të rritet konkurrenca, duke synuar në të njëjtën kohë që padyshim, skuadra më e mirë të jetë fituese.” Ndërkohë që gara mund të hapet në sezonin e ri, shpresohet që dallimet midis skuadrave të ngushtohen, si sa u përket pretendentëve, ashtu edhe pjesës tjetër.
“Unë mendoj se çdo fitore a çdo triumf, duhet të jetë i bazuar tek merita, – shpjegon më tej Ros Brauni. – Domethënë, unë sinqerisht nuk mendoj se rregullat e reja do ta ndryshojnë në mënyrë dramatike rendin e garave. Por unë mendoj se ato do t’i ngjeshin skuadrat me njëra-tjetrën dhe do të shohim më shumë skuadra sfiduese. Duhet tashmë që kemi pritur një “Mercedes” apo një “Red Bull” që ta fitojë garën, përderisa të mos ndodhte ndonjë gjë e papritur. Por tanimë jemi të bekuar me një numër pilotësh premtues në Formula 1.”
“Lando Norrisi, dy pilotët e “Ferrari”-t, Xhorxh Rasëlli tek “Mercedes”-i, pra mendoj se ndërthurja e pilotëve me makinat do të na dhurojë një sezon fantastik, prandaj jam optimist”, – ka përfunduar Drejtori i Motorsportit në Formula 1, Ros Braun.
