ASNN – Botërori i Formulës 1 ka zhvilluar të dielën garën e Çmimit të Madh të Monakos dhe piloti i “Red Bull”-it, Daniel Rikiardo, i cili e ka nisur nga vendi i parë garën e Principatës, ka arritur ta mbyllë atë gjithashtu në vendin e parë. Australiani ka lënë nga pas “Ferrari”-n e Fetelit dhe “Mercedes”-in e Hemiltonit. Sikundër i gjithë ky sezon, edhe gara e 6-të e tij është sjellë për sportdashësit drejtpërdrejt nga Rrjeti i Radio-Televizionit Shqiptar.
Ka qenë shumë pranë humbjes së një tjetër fitoreje në pistën e Monte Karlos, por, ndryshe nga 2016-ta, këtë herë fati ka qenë me të, duke e ndihmuar të përzërë gjithashtu edhe fantazmat e atij dështimit. Daniel Rikiardo ka bërë me “Red Bull”-in e tij aq sa duhej të dielën, për të triumfuar në Çmimin e Madh të Monakos, duke fituar duelin me gjermanin e “Ferrari”-t, Sebastian Fetel, ndërsa podiumin e plotësoi kryesuesi aktual i renditjes së pilotëve në Botërorin e Formula 1, Ljuis Hemilton.
Duket se, duke patur parasysh se shanset për parakalim në këtë pistë historike janë praktikisht mjaft të vogla, ky i fundit vendosi që të mos e kompromentojë garën e tij dhe të merrte 15 pikët e vendit të 3-të të kësaj gare, që e mbajnë atë në krye të renditjes së së pilotëve. Një tjetër pilot i “Ferrari”-it, Kimi Raikonen, mori vendin e 4-t, duke e ndihmuar skuadrën italiane ta shkurtonte në 22 pikë hendekun që e ndan nga skuadra gjermane në renditjen e konstruktorëve.
Vendi i 5-të i shkoi pilotit tjetër të “Mercedes”-it, Valteri Botasit, i cili u ndoq nga Esteban Okoni i “Force India”-s. Pjer Gasli i “Toro Rosso”-s bëri një garë të shkëlqyer, të denjë për çmimin e Pilotit më të mirë të ditës, që sidoqoftë i shkoi Rikiardos. Vendin e 8-të dhe të 9-të e morën përkatësisht Niko Hulkenbergu dhe Maks Verstapeni, dy pilotë që e nisën nga fundi këtë garë, ndërsa 10-shën e parë e plotësoi Karlos Sainzi.
Rikiardo e kaloi vijën e finishit me kohën 1 orë, 42 minuta, 54 sekonda e 807 të mijëtat, 7 sekonda e 336 të më i shpejtë sesa Feteli, ndërsa 10 sekonda më vonë mbërriti Hemiltoni. Britaniku kryeson renditjen e pilotëve me 110 pikë, i ndjekur nga Feteli me 92 pikë, kurse i 3-ti është Rikiardo, me 72 pikë.
