ASNN – Skuadra gjermane, më e shpejta në provat e lira në pistën e Principatës mesdhetare. Janë zhvilluar përgjatë ditës së enjte provat e lira të Çmimit të Madh të Montekarlos dhe ndryshe nga ç’ka ndodhur gjatë këtyre viteve të fundit, “Mercedes”-i ka dominuar me të dyja makinat e saj. Provat zyrtare të kësaj gare zhvillohen të shtunën, ndërsa gara të dielën. Në dy vitet e fundit, “Mercedes”-i është larguar nga Montekarlo duke kruar kokën se pse nuk ia ka dalë që “Shigjetat e saj të Argjendta” nuk kanë arritur t’i zotërojnë rrugët e Principatës.
Por, pas 3 orëve të provave të lira të enjten, duket se makina e njohur shkurt si “W10”-ta mund të jetë ajo që mund t’i japë fund vazhdës pa fitore. Vitin e shkuar, “Red Bull”-i ishte skuadra për t’u mundur në këtë pistë, me Mak Verstapenin më të shpejtin nga dy makinat. Fitorja duhet të kishte qenë e tij, por gabimet në provat zyrtare i dhanë mundësi shokut të tij të skuadrës, Daniel Riçiardo, nuk gaboi, duke e mbrojtur deri në fund fitoren përtej përpjekjeve të “Ferrari”-t të Sebastian Fetelit.
Ndonëse “Mercedes”-i nuk spikati, këtë vit skuadra gjermane ka ardhur në formë tjetër dhe, po të marrim për bazë paraqitjen në provat e lira, është ajo makina për t’u mundur në Montekarlo, me “Red Bull”-in dhe “Ferrari”-in jo shumë larg, sup më sup me njëri-tjetrin. Kjo nënkupton se skuadra gjermane, kampione në fuqi si për pilotë, ashtu edhe për konstruktorë, është në rrugë të mbarë për ta ruajtur të paprekur edhe në pistën e Principatës vazhdën mbresëlënëse të 100% fitoreve të këtij fillimsezoni.
Këtë e konfirmon edhe fakti se, si Ljuis Hemiltoni, ashtu edhe Valteri Botasi ishin aty, pranë e pranë njëri-tjetrit, siç kanë qenë shumicën e kohës gjatë këtyre garave të para të 2019-ës, duke qenë thuajse ¾-tat e sekondës më të shpejtë sesa të tjerët. “Ferrari” ishte sfiduesja më e afërt, por fare pranë ishte edhe “Red Bull”-i me Pjer Gaslinë. Megjithatë, në një garë ku parakalimi është thuajse tabu, nisja nga vendi i parë është vendimtare për fatin e podiumit.
Ndaj edhe skuadrat duan të sigurohen që të shtunën, në provat zyrtare të mos ketë gabime dhe të merret maksimumi. Ndryshe nga të gjithë garat e tjera të kalendarit të Formulës 1, e premtja është pushim në Çmimin e Madh të Montekarlos, ndërsa sikundër gjatë gjithë këtij sezoni, si provat zyrtare, ashtu edhe gara e së dielës do të sillen për sportdashësit drejtpërdrejt nga Rrjeti i Radio-Televizionit Shqiptar.
