ASNN – Ljuis Hemiltoni do të niset i pari në Çmimin e Madh të Montekarlos. Piloti britanik i “Mercedes”-it ka vendosur kohën rekord në sesionin e fundit të provave zyrtare. Nga vendi i dytë niset shoku i tij i skuadrës, Valteri Botas, i 3-ti, Verstapeni dhe, i katërti, Feteli. Nisje nga vendi i parë për Ljuis Hemilton në Çmimin e Madh të Principatës.
Piloti britanik i “Mercedes”-it vendos kohën rekord me 1 minutë, 10 sekonda e 166 të mijëtat, në sesionin e fundit të provave zyrtare duke bërë që të niset i pari në garën e së dielës. Për të kjo është nisja nga vendi i parë për herë të 85-të dhe i 98-ti për “Mercedesin” në Botërorët e Formulës 1. Provat zyrtare të garës së 6-të të Botërorit të Formula 1, asaj të Montekarlos, pistë qytetase, ka nisur me një klip kushtuar legjendës së Formula 1, Niki Lauda, i cili u nda nga jeta pak ditë më parë.
Ato i ka ndjekur edhe Princi i Monakos, Alberti i II-të. Ashtu si edhe në 5 garat e mëparshme, “Ferrari”, edhe këtu në Montekarlo ka bërë gafën e radhës. Lëklërku nuk arrin të kualifikohet në sesionin e dytë të provave zyrtare. Piloti nga Montekarlo ishte jashtë makinës së tij kur ka kuptuar se nuk është kualifikuar për në sesionin e dytë të provave.
Fytyra serioze te “Ferrari”, për këtë situatë aspak të mirë të krijuar. Gabim fatal i tyre teksa e kanë lënë në garazh pilotin vendas, duke menduar se ishte i sigurt se do të kualifikohej për më tej me kohën e dhënë. Por ka ndodhur e kundërta. Strategji krejtësisht e gabuar e skuadrës së kuqe. I zhgënjyer ka qenë vetë Lëklërku, pikërisht në pistën e shtëpisë së vet, ku mendonte të bënte surprizën.
Për rrjedhojë, do të niset nga vendi i 15-të. Ndërkohë që, në një pistë ku parakalimi është tabu, “Mercedes” i ka të dy makinat e saj në vijën e parë të nisjes, me Hemiltonin të parin e Botasin të dytin. Në vend të 3-të, Verstapeni, ndërsa nga vetëm vendi i katërt për Fetelin dhe “Ferrarin” e tij, që ka gabuar në kthesën nr. 12, gjë që i ka kushtuar shumë në renditje.
