ASNN – Piloti dhe skuadra gjermane, kandidatë në kategoritë përkatëse të çmimeve prestigjioze. Kabineti i tyre i trofeve mund të jetë rënduar dhe mbushur plot, por piloti “kampion”, Luis Hemiltoni, dhe skuadra “kampione” e Formulës 1, “Mercedes”-i, pritet të fitojnë edhe tjera trofe në ceremoninë e Çmimeve Prestigjioze Botërore “Laureus”, që do të zhvillohet më 17 shkurt 2020 kryeqytetin e Gjermanisë, Berlin. Po kështu, në kategorinë e “Momentit Sportiv të Vitit” figuron nga bota e Formulës 1 edhe njëfarë Mik Shumakeri.
Ky është kandidimi për herë të 6-të i Hemiltonit për të ashtuquajturit Çmimet “Oskar” të botës sportive, teksa është përzgjedhur në 2009-ën, në 2015-ën, në 2016-ën, në 2018-ën dhe në 2019-ën, por nuk ka arritur asnjëherë të shpallet “Sportisti i Vitit”. Mikael Shumakei dhe Sebastian Feteli janë të vetmit pilotë nga Formula 1 që e kanë fituar këtë çmim. A mund të jetë ky viti i Hemiltonit. Ai siguroi titullin e 6-të të kampionit të botës, me diferencën më të madhe të pikëve me ndjekësit, por lista e kandidatëve këtë vit është mbresëlënëse.
Britaniku përballet me 6 herë “kampionin e botës” në Moto GP, Mark Markezin, rekordmenin e maratonës, Eliud Kipçogen, i cili e uli kohën për herë të parë nën dy orë, fituesin e turneut “Masters” për 2019-ën në golf, fituesin e “Topit të Artë” në futboll, Lionel Mesin, dhe nr. 1 të tenisit botëror, Rafael Nadal. Ndërkaq, Mik Shumakeri mund të vijojë në hapat e babait të tij, duke fituar Çmimin e “Momentit Sportiv të Vitit”, teksa pilotoi “Ferrari”-n F2004, në pistën e Hokenhaimit, 15 vjet pasi piloti legjendar korri suksesin historik, duke fituar titullin e 7-të të kampionit të botës me të njëjtën makinë.
Edhe “Mercedes”-i, që nuk i trembet konkurrencës, është kandidate për Çmimin e “Skuadrës Botërore të Vitit”, ku përballë ka fituesen e Ligës së Kampioneve në futboll, Liverpulin, fituesen e Botërorit të Regbisë, Afrikën e Jugut, kampionen e NBA-së, Toronto Reptors, fituesen e Botërorit të Futbollit të Femrave, Shtetet e Bashkuara të Amerikës, dhe fituesja e Botërorit të Basketbollit të Meshkujve, Spanjën. Teksa është për herë të 6-të kandidate për Çmimet “Laureus”, skuadra gjermane, e fitoi para dy vitesh këtë çmim, duke u bërë e dyta skuadër e Formulës 1 që e fitoi këtë çmim pas “Braun”-it në 2010-ën.
