ASNN – Drejtori administrativ i kompanisë japoneze “Honda” vlerëson lart pilotin holandez. Triumfi i Maks Verstapenit në Çmimin e Madh të Austrisë i dha “Hondës” të parën fitore që nga rikthimi në Formula 1 në 2015-ën, dhe i ka rritur gjasat që kompania japoneze e prodhimit të automobilave të mbetet në nivelin më të lartë të këtij sporti edhe përtej 2020-ës. Drejtori administrativ i “Hondës” për Formula 1-shin, Masashi Jamamoto, ka deklaruar se është tepër e rëndësishme për kompaninë që ai përfaqëson që të ketë si pjesë të projektit të saj një pilot si Maks Verstapeni i “Red Bull”-it. Triumfi i Verstapenit në Çmimin e Madh të Austrisë i dha “Hondës” të parën fitore që nga rikthimi në Formula 1 në 2015-ën, dhe i ka rritur gjasat që kompania japoneze e prodhimit të automobilave të mbetet në nivelin më të lartë të këtij sporti edhe përtej 2020-ës. Jamamoto beson se mënyra e pilotimit të holandezit është një nga faktorët vendimtarë që “Honda” dhe skuadra e “Red Bull”-it ka arritur rezultate mbresëlënëse në këtë gjysmë të parë të këtij sezoni të Formulës 1, ku përfshihet edhe një fitore në Gjermani dhe një nisje, për herë të parë, nga vendi i parë në Hungari. “Ai është mjaft i rëndësishëm për ne”, – tha Jamamoto, duke vijuar: “Është shumë e rëndësishme që kemi një pilot si ai. Së pari, ai është mjaft i mirë si pilot, ai është mjaft i mirë në komunikimin me inxhinierët. Ai është mjaft i mirë në analizën që u bën të dhënave dhe vetë pilotimit të tij. Ai madje mund të japë edhe përshtypje mjaft të sakta sa i përket shasisë dhe motorit, kështu që është i shkëlqyer.” Maks Verstapeni mban vendin e 3-të në renditjen e përgjithshme të pilotëve dhe synon të sfidojë Valteri Botasin për vendin e dytë në gjysmën e dytë të sezonit. Holandezi i “Red Bull”-it ka korrur deri tani dy fitore, është ngjitur 5 herë në podium në këto 12 garat e deritanishme të këtij sezoni dhe ka fituar 76 pikë më tepër sesa kishte bërë në të njëjtën fazë të sezonit të shkuara me motorin “Renault”. Suksesi i “Hondës” deri më tani me Verstapenin dhe “Red Bull”-in përfaqëson shansin më të mirë të kompanisë aziatike për të marrë një rezultat të mirë më vonë në pistën e shtëpisë në Japoni.
