ASNN – Drejtuesi i skuadrës së “Red Bull”-it, Kristian Horner, beson se piloti australian Daniel Riçiardo u largua sepse i trembej shndërrimit në një pilot të dytë të skuadrës, në mbështetje të Maks Verstapenit. Horneri ka zbuluar se ai vetë e mësoi lajmin vetëm një ditë përpara se të zyrtarizohej dhe ishte aq i shtangur, saqë fillimisht kishte menduar se ishte një shaka.
Kalimi i Daniele Riçiardos nga “Red Bull”-i tek “Renault” sezonin e ardhshëm ishte një nga lajmet më të bujshme të merkatos së Formula 1 dhe tanimë kanë dalë disa hollësi interesante mbi atë që ka ndodhur. Ka qenë vetë kreu i skuadrës austriake, Kristian Horner, i cili ka zbuluar se ai vetë e mësoi lajmin vetëm një ditë përpara se të zyrtarizohej dhe ishte aq i shtangur, saqë fillimisht kishte menduar se ishte një shaka.
“Që të jem i sinqertë, mendova se po mundohej të bënte shaka apo të më ngacmonte, kur më mori në telefon dhe më tha se po shkonte te “Renault””, – pohoi Horneri. – Mos është kjo ndonjë shaka për pushimet verore, iu përgjigja. Por shpejt m’u bë e qartë se kjo ishte zgjedhja e tij dhe duhet ta respektosh. “Renault” është një skuadër në rritje dhe që po investon, prandaj mendoj që ishte një zgjedhje e frymëzuar nga ana e tij.”
Ndërkohë, duke folur për arsyet e vendimit të Riçiardos, drejtuesi i skuadrës së “Red Bull”-it beson se piloti australian u largua sepse i trembej shndërrimit në një pilot të dytë të skuadrës, në mbështetje të Maks Verstapenit. “Ne nuk kemi bërë absolutisht asnjë diferencim midis dy pilotëve tani që ta bënte atë të ndjehej pilot i dorës së dytë”, – vijoi Horneri.
“Natyrisht, është fakt që rivaliteti midis dy pilotëve tanë është shumë i madh. Por ne e respektojmë vendimin e Riçiardos për të patur një rol parësor edhe pse në një mjedis më modest. Mendoj se Danieli vendosi se ishte koha e përshtatshme për të për të provuar diçka tjetër, ndonëse për mendimin tim, ky është një bast i guximshëm i tij në këtë fazë të karrierës. Por koha do ta tregojë”, – përfundoi kreu i skuadrës së “Red Bull”-it, Kristian Horner.
