ASNN – Piloti gjerman, i pakënaqur, përtej vendit në podium në garën e Çmimit të Madh të Hungarisë. “Ferrari” duhet t’i bëjë më mirë detyrat e shtëpisë, pas një paraqitje jo dhe aq të mirë në Çmimin e Madh të Hungarisë. I këtij mendimi është piloti gjerman i skuadrës italiane, Sebastian Fetel, i cili mori vendin e 3-të në këtë garë. Sikundër i gjithë ky sezon i Formulës 1, edhe gara e Hungarisë u soll për sportdashësit drejtpërdrejt nga Rrjeti i Radio-Televizionit Shqiptar.
Feteli këmbëngul se ai “provoi gjithçka” me qëllim që të arrinte një rezultat të mirë të dielën në Çmimin e Madh të Hungarisë në Formula 1, por, ndonëse siguroi për të dytën garë radhazi podiumin, gjermani nuk ishte i lumtur, sepse mbërriti në finish më shumë se një minutë pas fituesit të garës, Ljuis Hemiltonit. 4-herë “kampioni” i botës bëri një nga paraqitjet më të mira të 2019-ës në garën e Gjermanisë, duke dhënë shpresë se piloti i “Ferrarit” do të vinte me një tjetër mendësi dhe formë në Çmimin e Madh të Hungarisë, ku ai pati triumfuar në 2017-ën.
Por, pasi dështoi të bënte një sfidë për nisjen nga vendi i parë në provat zyrtare të së shtunës, gara e së dielës për “Ferrarin” uy shndërrua në një betejë vetmitare midis Fetelit dhe Sharl Lëklërkut për shkallën më të ulët të podiumit. Gjermani e fitoi atë betejë, duke qenë se kishte garuar më gjatë dhe duke i lejuar atij të përfitonte nga gomat e buta për fazën finale të garës, çka i mundësoi atij të parakalonte shokun e tij të skuadrës drejt fundit të garës. “Qartësisht që nuk mund të jem i lumtur, sepse nuk ishim të shpejtë në këtë garë, – tha piloti i “Ferrarit” pas garës.
“Të humbësh 60 sekonda në 70 xhiro është mbase e drejtë dhe kjo është ajo që na mungoi. Mbase ne nuk zgjodhëm strategjinë më të shpejtë, por, në tërësi, ne nuk ishim mjaftueshëm të shpejtë, prandaj kemi shumë detyra shtëpie për të bërë. Nuk është se kjo na erdhi papritur, Sepse ne e dinim që më parë, kështu që është në dorën tonë që ta zgjidhim këtë çështje brenda dy muajve të ardhshëm, me shpresën se mund të bëjmë ndryshimin nga fundi i vitit”, – përfundoi piloti gjerman i “Ferrarit”, Sebastian Fetel, duke folur pas përfundimit të garës së Hungarisë.
