ASNN – Vjen momenti i madh tek “Ferrari” për djalin e Shumakerit, testi i parë sezonin e ardhshëm. “Ferrari” deklaroi se mund t’ia japë një mundësi në Formula 1 djalit të Mikael Shumakerit, Mikut. Ky i fundit do ta ketë mundësi të marrë pjesë në fazën testuese në sezonin e ardhshëm. Presidenti i skuadrës, Xhon Elkan, në një intervistë të dhënë për “Detroit Motor Show”, nuk e përjashtoi mundësinë që kjo gjë të ndodhë realisht.
“Kjo është diçka për të cilën do të flasim në kohën e duhur, – u shpreh Elkan i pyetur për këtë çështje nga media në fjalë, – jemi duke e menduar dhe nuk e përjashtojmë si mundësi.” Shumë gjëra ai i la të nënkuptuara, por dihet që djali i Shumakerit do të garojë këtë edicion në Formula 2. Megjithatë, është një faqe e specializuar në motosporte në Itali që shkruan se “Ferrari” mund t’ia japë mundësinë atij të testohet me “kokëkuqen” italiane që këtë edicion.
Faza testuese e “Ferrarit do të zhvillohet pas garave në Bahrein dhe në Spanjë. E ndërsa Mik po bëhet gati për hapin e madh në karrierë, gjithçka është mbështjellë me mister sa i përket Shumakerit të madh dhe shëndetit të tij. Por me afrimin e të birit pranë Formulës 1, duket se trashëgimia e mbiemrit “Shumaker” do të vazhdojë nëpër pistat e shpejtësisë.
