ASNN – Ish-kreu i Formulës 1: “Pilotët duhet të këmbëngulnin për të hyrë në pistë”. Çmimi i Madh i Belgjikës 2021, është tashmë në librat e historisë së Formula 1, si më i shkurtri me vetëm dy xhiro dhe që shpërndau gjysmën e pikëve të një gare. Shikueshmëria e pamjaftueshme për pilotët, e shkaktuar nga shiu në Spà e bëri të pamundur garimin, dhe ky ishte një vendim unanim nga ana e të gjithë pilotëve. Por Ljuis Hemiltoni e quajti “një mashtrim”, gjithçka që ndodhi në Spà, gjë për të cilën pajtohet edhe Berni Ekleston: “Unë pajtohem me Ljuisin”.
“Nuk e bëj gjithmonë këtë përsa i përket atyre që thotë piloti britanik, por në këtë rast ka të drejtë”, – shtoi ish-kreu i Formulës 1, i cili sidoqoftë tha se, nëse do të ishte ai në detyrë, nuk do ta anulonte garën: “Ne kemi garuar në kushte më të këqija atmosferike se këto në Belgjikë të dielën dhe nuk e kemi anuluar garën. Nëse doni të garoni mirë, nëse jo, po prapë mirë. Askush nuk i ka vënë armën në kokë pilotëve për të hyrë në pistë apo jo. Çdo gjë varet vetëm prej tyre. Nëse do të doja të shënoja pikë për ekipin dhe veten time, sigurisht që do të vazhdoja garën.|
“Megjithatë njerëzit marrin vendimet e tyre pa detyrim sepse nuk jemi në Afganistan këtu”, – shtoi Eklestoni. Ai gjithashtu kritikon vendimet e marra gjatë më shumë se 4 orëve që kaluan në Spà. Më tej shpjegon se si ai do të ishte përpjekur të shpëtonte garën. “Në orën 3:00 pasdite, kur gara duhej të fillonte, do të thoja ‘ne do të provojmë përsëri në 16:00 ose në 16:30 pasdite, – thotë ish-pronari i Formulës 1. -Nuk duket se kushtet do të përmirësohen, por pavarësisht se çfarë ndodh, do të fillojë”. Por drejtuesit e Formulës 1 nuk i kanë miratuar deklaratat e Ljuis Hemiltonit.
Britaniku i ka akuzuar ata si “lakmitarë”, pasi duhej të rimbursonin tifozët pas garës së Belgjikës, pasi ata pritën më shumë se 4 orë në shi për parë vetëm dy xhiro garë. Drejtuesit e Formula 1 i kanë thënë Hemiltonit se ai duhej të fliste privatisht me ta dhe jo në publik. Megjithatë, shtrohet pyetja se, nëse Ljuisi do të ishte në vendin e parë, a do të fliste kështu? Dhe është Zhan Todt, presidenti i FIA-s, ai që dëmtohet veçanërisht nga akuzat e Hemiltonit. Ndërsa drejtori i garës, Majkëll Masi, do të ishte i mallkuar nëse lejonte që gara të shkonte përpara dhe i mallkuar nëse nuk e bënte.
Dhe ai vendosi të bënte këtë të fundit duke menduar për jetën e pilotëve.
