ASNN – Kategoria Superiore ka hyrë në një fazë vendimtare përfatet e sezonit. E ndërsa ka ekipe që kanë objektiv titullin dhe janë në garë të fortë për të realizuar qëllimin e tyre, sikurse ndodh me Partizanin dhe Kukësin, ka edhe skuadra që janë zhytur në krizë dhe nuk po dalin dot. Një prej tyre është Flamurtari. Nuk ka më rëndësi se cilat janë shkaqet që çuan në këtë situatë, por fakti është se skuadra vlonjate po kalon ditë të dëshpëruara dhe me një paqartësi për të ardhmen.
Janë larguar lojtarët kryesorë të formacionit, përfshi dhe dy sulmuesit e spikatur, Danilo Alvesh dhe Tomisllav Bushiç. Së fundmi u largua dhe mesfushori cilësor Muhamed Useini, i cili me të gjitha gjasat do të përfundojë në kampionatin maqedonas, sepse merkato në Maqedoni zgjat deri më 15 shkurt. Vetë Useini ka lënë një mesazh për klubin, por mesazhi në fakt u drejtohet tifozëve dhe ai e sheh veten si tifoz të Flamurtarit, duke uruar për ditë të mira.
“Dëshiroj të ju falënderoj për të gjithë dashurinë, mbështetjen që kam pasur dhe që e kam. Nuk do t’i harroj kurrë disa momente dhe ndeshje speciale, – shkruan mesfushori i kuqezinjve në postimin e tij. – Do të më mungojë Flamurtari F.C dhe Vlora. Ju uroj shumë suksese në vazhdimësi dhe besoj të shkojë Flamurtari aty ku e ka vendin. Do ngelem tifozi me i zjarrtë i skuadrës. Me respekt M.U22!” Në fakt, në Vlorë situata nuk është aspak premtuese.
Flamurtarit i ka mbetur vetëm “flamuri”, pasi “ushtarët” po e braktisin një e nga një. Kjo skuadër ka hyrë në krizë financiare për shkak të mosdhënies së pagesave. Ka një ngërç në marrëdhëniet midis klubit dhe Bashkisë, i cili ka sjellë pasoja të rënda. Nëse situata nuk zgjidhet shpejt, ka gjasa që skuadra të futet në zonën e mbijetesës brenda pak javëve dhe të rrezikojë madje dhe rënien. Zgjidhja e vetme duket se mbeten të rinjtë, që duan një shans të luajnë.
