ASNN – Flamurtari regjistroi të shtunën fitoren e dytë radhazi në kampionat, pasi mundi Kamzën 1-0 dhe siguroi një trepikësh që e afron ndjeshëm me kryesuesit, tashmë vetëm 8 pikë larg kreut që mbahet nga Partizani. Pra, fitorja e afroi Flamurtarin e trajnerit Ilir Daja me kryesuesit dhe është plotësisht në vallen e titullit. Në këtë ndeshje për vlonjatët mjaftoi një gol i shënuar në pjesën e parë nga malazezi Bushiç, një gol që rezultoi me peshë për fatet e ndeshjes dhe i dha një 3-pikësh të merituar skuadrës vlonjate.

Fytyra e qeshur e trajnerit Ilir Daja pas takimit tregonte entuziazmin e kampit vlonjat dhe njëherësh rikthimin e kësaj skuadre në garë për objektivin madhor të sezonit. Dy javë më parë Flamurtari ishte 12 pikë larg kreut, kurse tani vetëm 8 pikë, një ecuri e mirë dhe domethënëse, gjë që e bën kampionatin akoma më të rivalizuar e më të fortë. Kamza nuk ia doli të dalë me pikë nga Vlora dhe dëshpërimi lexohej edhe prezantimin e trajnerit Ernest Gjoka, i cili i luajti mjaft mirë kartat e tij taktike, por grupi nuk u tregua vigjilent në momentin e pësimit të golit, duke ia falur fitoren Flamurtarit.

Qëllimi i Kamzës së Gjokës në këtë ndeshje ishte mbrojtja efikase dhe marrja e një pike, por që Gjoka dhe djemtë e tij nuk ia dolën këtë herë. Me fitoren e së shtunës, Flamurtari shkon në 28 pikë, por mbetet në vend të gjashtë, me një pikë më pak se Laçi dhe Teuta që ndajnë vendin e 4-t dhe të 5-të. Kurse Kamza mbetet në vend të parafundit me 12 pikë, një më pak se Luftëtari i vendit të 8-të dhe dy më pak se Tirana e vendit të 7-të. Sidoqoftë, gara për mbijetesë do të jetë e vështirë dhe e luftuar deri në javën e fundit.

Kategoria Superiore

Java e 16-të

Të premten, 14 dhjetor 2018:

Partizani – Kukësi                0-0

Të shtunën, 15 dhjetor 2018:

Laçi – Tirana                          2-1

Flamurtari – Kamza              1-0

Të dielën, 16 dhjetor 2018:

Kastrioti – Teuta                    (14:00)

Skënderbeu – Luftëtari        (17:00)

Renditja

Nr.       Skuadra                     N.        F.         B.        H.        Gsh-Gp          Pikë

1. Kukësi                        17          9        4            4        16-9                31
2. Partizani                    17        11        3            3        18-8                36
3. Skënderbeu              16          9        3            4        18-9                30
4. Teuta                          16          8        5            3        19-12              29
5. Laçi                             17          8        5            4        15-12              29
6. Flamurtari                  17          8        4            5        15-11              28
7. Tirana                         17          3        5            9        18-21              14
8. Luftëtari                     16          4        1          11        11-18              13
9. Kamza                        17          3        3          11          8-20              12
10. Kastrioti 16          3        1          12        11-29              10