ASNN – Java e 10-të e Grupit A të Kategorisë së Parë në Basketboll për Femra, dhuroi të shtunën një rezultat surprizë. Flamurtari i shkakton SH.K.B.F. Tiranës humbjen e parë në këtë sezon, duke tronditur jo vetëm ekipin bardheblu dhe trajnerin Erdal Borova, por njëherësh duke rihapur garën për titull dhe duke e bërë akoma më enigmatike rrugëtimin drejt titullit në këtë kampionat. Ndeshja e luajtur në kryeqytet ishte një nga më të bukurat e këtij sezoni në këtë gjini.

Në të 4 pjesët e lojës pati rivalitet për çdo top, për çdo aksion dhe për çdo pikë. Ishte një hakmarrje e Flamurtarit, i cili kishte humbur duelin e fazës së parë në Vlorë dhe tani erdhi momenti të tregonte vlerat e tij në fushën e lojës. Për vajzat vlonjate ishte një rikthim i bujshëm dhe njëherësh me plot vetëbesim që jep siguri për vazhdimësinë. U duk prej disa javësh që Flamurtari po kthehej. Shumë e kishin marrë për skuadër që kishte humbur shkëlqimin dhe kishte rënë në cilësi.

Por ndeshja e së shtunën tregoi dhe një herë se ky është një ekip pretendent dhe është pengesë për të gjitha skuadrat pjesëmarrëse që të arrijnë titullin në këtë edicion të basketbollit të femrave. Ndeshja ishte emocionuese, pasi kishte rivalitet hap pas hapi. Dhe deri në fund u luhat, pasi fituesi mund të ishte secili prej ekipeve në fushën e lojës. Sidoqoftë, falë përvojës dhe njëherësh besimit në vetvete, Flamurtari ia doli të fitonte 75-83.

Por edhe të siguronte një dypikësh që e ngjit automatikisht në vend të dytë, vetëm dy pikë larg SH.K.B.F. Tiranës së trajnerit Erdal Borova. Tashmë kampionati është plotësisht i hapur dhe kjo është pikërisht për meritë të skuadrës vlonjate që drejtohet nga trajneri Viron Toska. Më në fund u thye edhe miti i Tiranës së Borovës që llogaritej si skuadër e pathyeshme.

Kampionati Kombëtar

i Basketbollit – Femra

Kategoria e Parë

Grupi A

Java e 10-të:

Të premten, 14 dhjetor 2018:

Elbasani – Studenti                          60-66

Vllaznia – SH.B.F. Tirana                60-82

Të shtunën, 15 dhjetor 2018:

SH.K.B.F. Tirana – Flamurtari        75-83

Renditja

Nr.       Skuadra                     N.        F.         H.        Psh-Pp           +/-                    Pikë

1. SH.K.B.F. Tirana      10        9            1        867-674         193                19
2. SH.B.F. Tirana          10        7            3        794-613         181                17
3. Flamurtari                  10        7            3        764-666            98                 17
4. Vllaznia                     10        5            5        665-724           -59                15
5.        Studenti                     10        2            8        602-780         -178                12
6. Elbasani                    10        0          10        612-867         -245                10