ASNN – Kategoria Superiore e Kampionatit Kombëtar të Futbollit luan sot 3 takimet e javës së saj të 10-të, që është njëkohësisht edhe java e parë e fazës së dytë, nga 4 të tilla, të këtij sezoni.
Sikundër ka bërë çdo javë, Rrjeti i Radio-Televizionit Shqiptar do të sjellë për sportdashësit drejtpërdrejt takimin më të spikatur të javës. Bëhet fjalë për ndeshjen që luhet në Vlorë, duke nisur nga ora 17:00, midis Flamurtarit dhe Skënderbeut.
Korçarët aktualisht kryesojnë renditjen, me 20 pikë të marra në këto 9 javë të para, ndërsa vlonjatët mbajnë vendin e 7-të, me vetëm 9 pikë. Më herët, duke nisur nga ora 14:00, luhen dy takimet e tjera të kësaj jave, Luftëtari-Partizani dhe Laçi-Korabi.
Ndërsa dy takimet e fundit të javës së 10-t të Kategorisë Superiore luhen të dielën dhe, duke nisur nga ora 14:00, Kukësi pret në fushën e vet Vllazninë, ndësa duke nisur nga ora 17:00, Teuta është mysafire në kryeqytet, për t’u ndeshur me Tiranën.
