ASNN – Flamurtari ka fituar edhe ndeshjen e tretë të “play-out”-it në basketboll për meshkuj ndaj Superior Klimës dhe ka siguruar kështu qëndrimin edhe për sezonin tjetër në mes më të mirëve të koshit shqiptar. Ekipi i drejtuar nga trajneri Vladimir Birçaj ka fituar me rezultatin 76-67. Kjo ishte ndeshja e tretë pas dy takimeve të para, të cilat sollën nga një fitore në fushat përkatëse për të dyja ekipet.
Loja ka nisur mjaft e shpejtë dhe me aksione të vazhdueshme, veçanërisht nga ekipi mik. Që në minutat e para, Qilimi dhe Pregja kanë arritur të krijojnë epërsinë me 2-3 pikë diferencë ndaj vendësve. Por në përfundim të pjesës së parë, Kaso dhe Sotiri kanë arritur të barazojnë rezultatin në 18-18. Në pjesën e dytë janë përsëri miqtë që vazhdojnë të zhvillojnë një lojë të kënaqshme, por dhe të ashpër duke krijuar shpesh edhe ndalesa të lojës.
Fillimisht u krijua përshtypja se ky ekip do të përsëriste fitoren e ndeshjes së zhvilluar në Tiranë, pasi gjysmën e parë e mbyllin në epërsi 33-30, aty ku spikati Gjeçi dhe Qilimi. Në pjesën e dytë të lojës, Flamurtari zgjohet dhe merr në duar frenat e saj duke zhvilluar një lojë spektakolare, me aksione të shpejta dhe shumë pikë të shënuara. Dhe pjesa e tretë është mbyllur 26-12. Nga ana tjetër, Jareci dhe Pregja dalin nga fusha e lojës, pasi plotësuan numrin e personaleve.
Në pjesën e fundit, Flamurtari lëshoi disi terren, pasi dhe dy prej lojtarëve të saj kryesorë lanë fushën e lojës me 5 personale. Superior Klima e fitoj këtë pjesë me 2 pikë diferencë, 20-22, por kjo nuk mjaftoi për të përmbysur situatat. I gjithë takimi përfundoj 76-67 për vlonjatët, të cilët kishin përballë një ekip të ndërtuar mirë dhe me perspektivë për të ardhmen. Por mungesa e eksperiencës ishte faktori që ndikoi në këto takime. Përfundimisht Flamurtari mbetet mes më të mirëve të basketbollit shqiptar.
Flamurtari – Superior Klima 76-67 (2-1)
(18-18,12-15,26-12,20-22)
Flamurtari: Kaso, Sotiri, Toska, Dede, Beko / Mino, Bacaj, Todi, Gani, Nuredini, Kollovi. Trajner: V. Birçaj
Superior Klima: Qilimi, Troja, Beqo, Pregja, Shytaj / Gjeçi, Ferraj, Jareci, Shushku, Dedaj, Qeleshi, Nikolli. Trajner: E. Çarçani
Gjyqtarë: G. Hoxha, A. Dulçe (Tiranë), G. Basho (Shkodër)
