ASNN – Në Vlorë, futbolli hesht. Edhe pse pritej që këtë të enjte, vlonjatët të prezantonin zyrtarisht për mediat dhe publikun edhe afrimin e fundit në merkato, siç ishte fakt një afrim i bujshëm, ai i sulmuesit të njohur shkodran, Xhevahir Sukaj, një gjë e tillë nuk ka ndodhur. Nga klubi i Flamurtarit është komunikuar zyrtarisht se drejtuesit kanë marrë vendimin për heshtje për shtyp tek për gjithë lojtarët, të paktën deri pas ndeshjes së radhës, asaj me Kukësin, që do të luhet ditën e shtunë në orën 17:00.

Nuk ka një komunikim të mëtejshëm nëse heshtja do të vijojë dhe vlen edhe për trajnerin, para takimit të radhës në kampionat. Por diçka e tillë pritet të konfirmohet vetëm ditën e premte, 24 orë para zhvillimit të ndeshjes. Klubi vlonjat ka vendosur kështu që asnjë prej lojtarëve të mos dalë para kamerave, edhe pse në rastin e Sukajt bëhej fjale për një prezantim, që sidoqoftë ishte i shumëpritur duke patur parasysh se është një përforcim i spikatur dhe përkundër rrymës së largimeve nga klubi vlonjat.

Ndoshta me synimin për t’u përqendruar vetëm tek ndeshja dhe  për të evituar pyetjet mbi situatën aktuale, sidomos lidhur me financat, kanë sjellë edhe vendimin më të fundit për klubin vlonjat, që përcakton kështu heshtje për shtyp për të gjithë lojtarët. Nga burime te klubit mësohet se kjo situatë pritet të vijojë deri pas ndeshjes me Kukësin dhe, më pas, do të ketë një tjetër vendim lidhur me komunikimin zyrtar dhe daljen para mediave të lojtarëve të skuadrës vlonjate.