ASNN – Tirana humbi por nuk e meritoi, Flamurtari fitoi por nuk e meritoi. Java e 9-të e Kategorisë Superiore u mbyll sot në mbrëmje me ndeshjen Flamurtari-Tirana, e cila u fitua nga vlonjatët me rezultatin e ngushtë 1-0. Ishte një ndeshje pa shumë ritëm, me mjaft gabime në pasime nga të dyja skuadrat dhe ku diferencën e bëri goli i Danilo Alveshit në minutën e 72-të.

Një gol që erdhi më shumë për faj të Tiranës që gaboi nga një shpërqendrim i momentit, sesa nga ndonjë meritë e skuadrës vlonjate.Sa i takon ndeshjes, në këtë përballje më mirë luajti Tirana, e cila veçanërisht në pjesën e parë krijoi më shumë raste shënimi dhe ishte në tërësi më këmbëngulëse. Por ajo shpërdoroi dhe nuk kishte saktësi në goditjen përfundimtare.

Tirana e humbi këtë ndeshje, por në mënyrë të pamerituar. Nga ana tjetër, Flamurtari e fitoi këtë duel, por në mënyrë të pamerituar. Vlonjatët zhvilluan një prej ndeshjeve më të dobëta të këtij sezoni, por fituesi nuk gjykohet, sepse skuadra kuqezi mori tri pikë që e çojnë në 14 pikë, njëlloj me Teutën që mban vendin e 5-të. Theksojmë gjithashtu se trajneri Ardian Mema e nisi me humbje aventurën e tij në krye të bardhebluve.

Ai humbi duelin me homologun Ilir Daja, me të cilin deri pak ditë më parë drejtonin së bashku pikërisht Flamurtarin. Humbja nuk e dëmton Memën, madje ai vetë tha pas ndeshjes se pavarësisht humbjes skuadra ishte prezantuar mirë dhe në aspektin e lojës kishte bërë përparime.

Kampionati Kombëtar

i Futbollit 2018-2019

Kategoria Superiore

Java e 9-të

Të shtunën:

Laçi – Teuta                           0-3

Kastrioti – Kukësi                 1-2

Të dielën:

Skënderbeu – Kamza          2-0

Partizani – Luftëtari              2-1

Të hënën:

Flamurtari – Tirana               1-0

Renditja

Nr.       Skuadra         Pikë

1. Partizani        22
2. Skënderbeu  19
3. Kukësi            16
4. Laci                 16
5. Teuta              14
6. Flamurtari      14
7. Tirana               8
8. Kamza              7
9. Luftëtari           6
10. Kastrioti   4