ASNN – Ndërkohë që Skënderbeu është në “play-off”-et e Ligës së Kampioneve, edhe Kombëtarja kuqezi vazhdon të ngjisë shkallët e renditjes botërore dhe, sikundër pritej, ajo tashmë mban vendin e 22-të. Organizmi që qeveris futbollin botëror, FIFA, ka botuar renditjen për muajin gusht, ku Shqipëria, si kurrë më parë, renditet e 22-ta, duke lënë prapa Francën, që është e 24-ta, dhe Danimarkën, që është e 25-ta, si dhe bindshëm Serbinë dhe Armeninë, përkatësisht në vendin e 66-të dhe të 88-të.
Ajo që deri dje ishte jozyrtare, tashmë është zyrtarizuar, pasi organizmi që qeveris futbollin botëror, FIFA, ka botuar renditjen për muajin gusht, ku Shqipëria, si kurrë më parë, renditet e 22-ta në botë. Natyrisht, në këtë ngjitja me plot 14 vende, që është më e madhja e bërë këtë muaj nga një përfaqësuese evropiane, dhe me 166 pikë, që gjithashtu është më e madhja për renditjen e këtij muaji, ka ardhur si rrjedhojë e vendimit të dhënë nga Gjykata e Arbitrazhit Sportiv (CAS) në dhjetëditëshin e parë të korrikut.
Me këtë vendim, Shqipërisë iu dha në tavolinë fitorja e ndeshjes së ndërprerë të 14 tetorit 2014 me Serbinë në Beograd. Kombëtarja kuqezi është njëra nga 6 ekipet që kanë arritur për herë të parë në histori vendin më të mirë në renditjen botërore të FIFA-s, së bashku me Uellsin, Austrinë, Slovakinë, Kongon dhe Guamin. Ajo që është e rëndësishme është se Shqipëria tashmë ka përpara në këtë renditje vetëm Portugalinë, që është e 4-ta, ndërsa ka lënë prapa Francën, që është e 24-ta, dhe Danimarkën, që është e 25-ta, si dhe bindshëm Serbinë dhe Armeninë, përkatësisht në vendin e 66-të dhe të 88-të.
Ndëkaq, përsa i përket 10-shes së parë, Argjentina nuk e ka lëshuar kreun, ndërsa Gjermania ka zbritur në vendin e 3-të, duke ia lënë vendin e dytë Belgjikës. Kolumbia, Brazili, Portugalia, Rumania, Anglia, Uellsi dhe Kili e plotësojnë këtë 10-shë, ku jashtë kanë mbetur Spanja, Holanda, Italia dhe Uruguaji.