ASNN – Xhani Infantino është zgjedhur sot presidenti i ri i FIFA-s, duke triumfuar në raundin e dytë të votimeve, të mbajtur gjatë Kongresit të Jashtëzakonshëm të organizmit që qeveris futbollin botëror. Duke folur pas zgjedhjes së tij në këtë post, Infantino e cilësoi këtë kongres si një shans për një nisje të re. Bota e futbollit ka tashmë një drejtues të ri dhe ai është një emër relativisht i papritur, sepse vetëm pak muaj më parë, vetë Xhani Infantino nuk e kishte menduar se do të zgjidhej president i FIFA-s.
Megjithatë, kështu ka ndodhur dhe italiano-zvicerani ka triumfuar në raundin e dytë të votimit, të mbajtur të premten në vendin e tij të lindjes, duke marrë 115 vota kundrejt 88 votave të Sheikut Selman nga Bahreinit. Në fakt, ishte hera e parë që nga viti 1974, që zgjedhjet për president të FIFA-s kërkonin një raund të dytë votimesh. Duke folur pas zgjedhjes së tij në këtë post, ku pason bashkëatdhetarin e tij famëkeq, Sep Blater, dhe eklipson edhe ish-shefin e tij në UEFA, Mishel Platini, Infantino e cilësoi këtë kongres si një shans për një nisje të re.
“Ju falënderoj të gjithëve për besimin që më keni dhënë dhe unë mund t’ju them se FIFA ka kaluar shumë vështirësi gjatë këtij viti të fundit, – ka deklaruar Infantino. – Por sot këto vështirësi, kjo krizë ka marrë fund, sepse komuniteti ynë i futbollit ka potencialin për ta rinisur gjithçka në rrugë të mbarë. Votimi i reformave nga ky Kongres ka shtruar edhe rrugën për ne dhe besoj se të gjithë bashkë ne do t’ia dalim.” Xhani Infantino do ta mbajë postin e presidentit të FIFA-s deri në vitin 2019, kur të zhvillohet Kongresi i ardhshëm i rregullt zgjedhor i organizmit që qeveris futbollin botëror.
