ASNN – Presidenti i FIBA Evropës, Turgaj Demirel, i ka dërguar një letër urimi kryetarit të Federatës së Basketbollit të Kosovës (FBK), Erolld Belegu. Në këtë letër, Demirel ndër të tjera e ka përgëzuar Belegun për paraqitjen e shkëlqyeshme të Kosovës në Kampionatin Evropian të Nën-16-vjeçarëve.
“Dua t’ju uroj juve, përfaqësuesen tuaj dhe Federatën për medaljen e argjendtë të fituar në Divizionin C të Kampionatin Evropian të Nën-16-vjeçarëve, – shkruan kreu i organizmit që qeveris basketbollin kontinental. – Kjo është një arritje e madhe për Kosovën.”
“Arritje që, para së gjithash, me më tepër vlerë duke u bazuar në faktin se kjo është hera e parë që përfaqësuesja juaj ka garuar në garat e FIBA Evropës, – vijon Demirel. – Unë e di se ky është vetëm suksesi i parë prej shumë të tjerëve që pritet të ketë Federata e Basketbollit e Kosovës në vitet në vazhdim.”
“Unë dua të përfitoj nga ky rast dhe të ritheksoj se jam shumë i lumtur që Kosova është bërë pjesë e familjes së FIBA Evropës dhe unë pres me padurim ta vazhdojmë bashkëpunimin me ju dhe Federatën tuaj dhe shpresoj se do të shihemi së shpejti”, – ka shkruar numri 1 i FIBA Evropës.
Duhet theksuar se Përfaqësuesja e Nën-16-vjeçarëve të Kosovës ka marrë pjesë në Divizionin C të Kampionatit Evropian të Nën-16-vjeçarëve, që i ka zhvilluar takimet e tij në San Marino, prej datës 6 deri më 11 korrik të këtij viti. Aty mori pjesë edhe Shqipëria, e cila bëri një paraqitje modeste.
