ASNN – Sharl Lëklerk dhe Karlos Sainz i riu janë takur me Drejtorin e Përgjithshëm të Ferrarit, në përgatitje për nisjen e sezonit të ri të Formula 1. Binoto është shprehur se nuk do të ketë pilot të parë e të dytë, por të dy do të jenë të barabartë. Ata do të luftojnë për të marrë pikët maksimale për skuadrën. Pra, Sharl Lëklerk dhe Karlos Sainz do të fillojnë sezonin e Formula 1 në 2021 me status të barabartë te Ferrari. Kështu është shprehur drejtori i përgjithshëm i skuadrës së kuqe, Matia Binoto.
Edhe pse Lëklerk do të hyjë në sezonin e tij të tretë me ekipin italian, ndërsa ish-piloti i “Toro Rosso”-s, “Renault” dhe “MekLaren”-it, Karlos Sainz është gati të nisë konkurrimin atje, Binoto e ka bërë të qartë se nuk do të ketë pilot numër një. “Nuk ka asgjë të shkruar në kontratën e Sharlit që të jetë udhëheqësi i ekipit, – tha ai. – Mendoj se të dy do të jenë të lirë të luftojnë për të fituar. Unë mendoj se është e rëndësishme që ata të mos dëmtojnë veten dhe shokun gjatë garës.”
“Pasi ata do të kenë mundësi të barabarta, gjatë gjithë sezonit”, – shtoi Binoto, i cili tha se përparësia e Ferrarit do të ishte gjithmonë marrja e pikëve maksimale për konstruktorë. “Prioriteti ynë kryesor, është të marrim pikët maksimale si ekip, – pohoi ai. – Pra, mund të ndodhë që në disa gara, do të jetë e rëndësishme që të dy në një farë mënyre të ndihmojnë ekipin, të pranojnë vendimet e tij, në interes të ekipit. Edhe gjatë sezonit, nëse do të ketë një avantazh të qartë të njërit pilot ndaj tjetrit, do të ketë një diskutim të hapur midis të dyve.”
“Do të shohim se si ne mund ta ndihmojmë njëri-tjetrin, por gjithnjë në të mirë të ekipit, sepse marrja e sa më shumë pikëve është përparësia e parë”, – ka shtuar italiani. Duke folur për përvojën e tij të re te “Ferrari”, Karlos Sainzi tha se kontakti fillestar i të qenit në objektin përrallor në “Maranelo” ishte diçka që ai do ta mbante mend për gjithë jetën e tij. “Është hera e parë që takohem me fabrikën e kuqe, e cila është padyshim, siç mund ta imagjinoni, është mjaft e veçantë”, – tha spanjolli.
“Është një ditë e veçantë për mua në përgjithësi, të cilën nuk do ta harroj kurrë. Unë jam plotësisht i gatshëm, plotësisht i motivuar për këtë sfidë të re”, – ka përfunduar piloti i “Ferrari”-t, Karlos Sainz.
