ASNN – Fernando Alonso është zgjuar në vitin 1995 pas aksidentit që pësoi gjatë testeve zyrtare në Montmelo, Barcelonë. Dy herë “kampioni i botës” nuk do të marrë pjesë në garën e parë në Melbërn, pas konsultimit me mjekët të cilët e mbajtën për një javë nën vëzhgim në spital.

E përditshmja spanjolle “El-Pais” njofton se gjatë qëndrimit në spitalin e Barcelonës, Alonsos i është kërkuar të thotë se kush është, çfarë bën dhe çfarë dëshiron të jetë në të ardhmen. Piloti i “McLaren”-it është përgjigjur: “Unë jam Fernando, pilotoj një makinë “Kart” dhe në të ardhmen dua të jem pilot në Formula 1”.

Në 1995-sën, Alonso ishte 13 vjeç dhe ndiqte shkollën “Holy Guardian Angel” në Oviedo. Babai i tij, Hozé Luis ishte një pilot amator në kart, botë të cilën i biri e preku që në moshën 3-vjeçare pas makinës që i ndërtoi i ati. 33-vjecari raportohet se nuk mban mend debutimin në vitin 2001 te Minardi.

Po kështu, ai nuk mban mend dy titujt e fituar me “Renault” apo dhe 4 trofetë e fituar nga Reali i Madridit në Ligën e Kampioneve. Një zëdhënës i skuadrës angleze është mjaftuar me fjalët: “Jemi të kënaqur që shërimi i Alonsos është në rrugë të mbarë, por gjithçka rreth gjendjes së tij shëndetësore është çështje e mjekëve që po e ndjekin.”

Nga ana e tyre mjekët kanë frikë se një incident i dytë mund ta vrasë spanjollin. Gjithçka mund të vijë pas sindromës së impaktit të dyfishtë dhe aksidentit të parë me një shpejtësi prej 215.6 km/orë. Ekspertë nga Klinika “Majo” në SHBA, shprehen se një aksident i dytë, pa u shëruar ende pasojat e të parit, do të ishin fatale për trurin e pilotit.

22-vjecari danez, Kevin Magnusen, do ta zëvendësojë në Australi, ndërsa Alonso ka vendosur si datë të kthimit garën e dytë, më 29 mars në Malajzi.