Kampionati Evropian i Taekuondosë për Të Rritur dhe Të Rritura, që po zhvillohet në Montro të Zvicrës ka rezultuar i pafat për shqiptarët, sepse janë humbur ndeshjet e për rrjedhojë dhe kualifikimi në momentet më të mira për ta. Delegacioni shqiptar, i përbërë nga Elvis Vulka dhe Julian Caca tek meshkujt ka qenë i përbërë nga tre sportistë Ledian Ceka në peshën 68 kg, Elvis Gjana në peshën 58 kg dhe Visar Pitushi në peshën deri në 63 kg.

Për femra ka konkurruar Ada Demneri në peshën deri në 53 kg, e cila ka qenë e shoqëruar nga trajneri i saj Leo Kapri. Pikërisht Demneri është mundur 5-7 nga turkja Sevik Sezen në një ndeshje normale në të tre raundet. Por e njëjta gjë ka ndodhur dhe Ledian Cekën, që është mundur 4-6 nga Ruis Boris e Andorrës. Kurse Elvis Gjanën në përballjen me bjellorusin Jahor Nikitsenka e ka dënuar sistemi teksa gjithçka ka qenë e barabartë.

I vetmi që nuk ka bërë ndeshje të mirë ka qenë Visar Pitushi, që është mundur 1-14 nga italiani Simone Kreshenzi. “Në përgjithësi, – thotë Vulka, – kanë qenë rezultate të ngushta dhe kryesime të vazhdueshme të ndeshjes, por fundi ka qenë i pakëndshëm. Megjithatë duke llogaritur rivalitetin e potencialin e kundërshtarëve, të cilët janë elitarë në Evropë dhe botë, më duhet të them se ka qenë përfaqësim dinjitoz, pavarësisht se rezultatet s’janë ato që deshëm”.

Përfundimisht të gjithë janë eliminuar në Evropianin e Montrosë, por këtë herë duket se edhe fati s’ka qenë me tanët.