ASNN – UEFA anulon turnetë si femra, ashtu edhe për meshkuj, që duhet të zhvilloheshin në korrik. Epidemia e virusit korona vazhdon ta pështjellojë kalendarin e veprimtarive sportive dhe të pezullojë veprimtari të ndryshme anembanë Evropës. Dhe viktima më e fundit është bërë Kampionati Evropian i grupmoshës së Nën-19-vjeçarëve, si për meshkuj dhe femra. Lajmi, që është përcjellë edhe nga Federata Shqiptare e Futbollit (FSHF), vjen pas vendimit të marrë nga Komiteti Ekzekutiv i UEFA-s për shkak të vështirësisë së madhe në udhëtimin e skuadrave.
Mësohet se këtë vendim të organizmit që qeveris futbollin kontinental e kanë pranuar edhe Federatat anëtare të saj. “Komiteti Ekzekutiv i UEFA-s vendosi sot të anulojë Kampionatin Evropian të 2021-shit për grupmoshën e Nën-19-vjeçarëve, si për femra, ashtu edhe për meshkuj, për shkak të epidemisë së “Covid-19” dhe efekteve të saj në organizimin e garave”, – thuhet në njoftimin, që më tej vijon: “Në procesin e kësaj vendimmarrjeje, Komiteti Ekzekutiv i UEFA-s vë në dukje se, me kufizimet aktualeve të qeverive, udhëtimet e skuadrave dhe organizimi i këtyre mini-turneve do të ishin shumë të vështira.”
“Federatat anëtare të UEFA-s u konsultuan dhe më pas e mbështetën vendimin, – sqaron njoftimi në fjalë. – Edhe pse është për të ardhur keq që asnjë turne për të rinj nuk mund të zhvillohet në sezonin aktual, shëndeti dhe siguria e futbollistëve të rinj duhet të kenë përparësi në rrethanat aktuale.” Evropiani i meshkujve përfshinte përfaqësueset e mëse 50 vendeve evropiane që zhvillonin grupet eliminatore me sistem grumbullimi në mars, duke vijuar me fazën finale prej 8 ekipesh, që duhet të niste më 30 qershor 2021 në Rumani.
Kurse Eliminatoret e Evropianit të Femrave ishin planifikuar të zhvilloheshin në prill, ndërsa faza finale do të mbahej në korrik në Bjellorusi. Edhe Evropiani i 2020-ës për këtë grupmoshë, si për meshkuj, ashtu edhe për femra, që duhet të zhvilloheshin përkatësisht në Irlandën e Veriut dhe Gjeorgji, u anuluan.
