ASNN – Kampionati Evropian i Basketbollit për Meshkuj, shkurt “Eurobasket 2015” do të luajë sonte aktin e tij të fundit, me finalen e madhe ku përballë njëra-tjetrës do të jenë Spanja dhe Lituania.

Sikundër i gjithë ky Kampionat, edhe finalja e sotme, që luhet duke nisur nga ora 19:00, do të sillet për sportdashësit drejtpërdrejt dhe falas nga Rrjeti i Radio-Televizionit Shqiptar.

Kështu, pas 15 ditësh të mbushura me spektakël në parket, kanë mbetur në lojë spanjollët, të cilët kanë pësuar 2 humbje gjatë rrugëtimit prej 8 ndeshjesh në këtë kampionat, ndërsa balltikët e kanë shijuar vetëm një herë humbjen në këto 8 takime.

Në fakt, finalja e sotme vë përballë njëra-tjetrës dy ekipe përfaqësuese që mbeten pretendente në basketbollin kontinental, por që në këtë kampionat nuk erdhën si favorite.

Për të ardhur në finale, Spanja shtangu favoritet për titull dhe përfaqësuesen vendase, Francën, ndërsa Lituania fitoi duelin e nervave me një tjetër favorite dhe finalisten e Botërorit, Serbinë.

Spanjollët vijnë në duelin e sotëm duke kërkuar të kurorëzohen për herë të 3-të kampionë të kontinentit, ndërsa lituanezët, për herë të 4-t.