ASNN – Kampionati Evropian i Basketbollit për Meshkuj, që njihet shkurt si “Eurobasket 2015” vijon fazën e ndeshjeve në grupe dhe sonte është mbyllur dita e katërt e tij, e cila ka dhuruar rezultate interesante.

Në grupin A, që po i luan ndeshjet në Montpelje të Francës, përfaqësuesja vendase ka marrë një fitore të rëndësishme, 74-67, ndaj Rusisë, ndërsa Finlanda ka fituar bindshëm ndaj Bosnjë-Hercegovinës, ndërsa Izraeli ka vuajtur për fitoren ndaj Polonisë.

Në këtë grup kryeson Franca, me pikë të plota, 8, pas 4 fitoresh, e ndjekura nga Izraeli, me një pikë më pak. Në grupin B, që po i luan ndeshjet në kryeqytetin gjerman, Berlin, ka spikatur fitorja e Italisë në shtesë ndaj përfaqësueses vendase, 89-82.

Po për këtë grup, Serbia ka mposhtur Turqinë, ndërsa Spanja ka fituar ndaj Islandës. Renditjen e këtij grupi e kryeson Serbia, me pikë të plota, 8, pas 4 fitoresh, e ndjekura nga Italia, me një pikë më pak

E njëjta tabllo është edhe në grupin C, ku kryeson Greqia, me pikë të plota, 8, pas 4 fitoresh, e ndjekura nga Sllovenia, me një pikë më pak. Grekët e fituan sonte duelin me sllovenët, ndërsa fitore korrën në Zagreb edhe kroatët vendas dhe gjeorgjianët.

Në grupin e fundit, grupin D, të trija ndeshjet kanë qenë të luftuara “dhëmb për dhëmb”, pasi Belgjika është mundur nga Republika Çeke 64-66, ashtu sikundër ka humbur me një pikë të vetme edhe Letonia vendase përballë Ukrainës, 74-75.

Edhe Lituania, ka vuajtur në derbin balltik, duke triumfuar ndaj Estonisë 64-62. Renditjen e këtij grupi e kryesojnë Republika Çeke dhe Lituania, me nga 7 pikë secila, të ndjekura nga Belgjika dhe Letonia, me nga 6, dhe Ukraina e Estonia, me nga 5 pikë.

Kampionati Evropian

i Basketbollit – Meshkuj

“Eurobasket 2015”

Rezultatet teknike të ditës së katërt:

Grupi A

(Montpelje – Francë)

Bosnjë-Hercegovinë – Finlandë   59-88

Poloni – Izrael                                  73-75

Rusi – Francë                                   67-74

Grupi B

(Berlin – Gjermani)

Turqi – Serbi                                     72-91

Gjermani – Itali                                 82-89 (me shtesë)

Islandë – Spanjë                              73-99

Grupi C

(Zagreb – Kroaci)

Greqi – Slloveni                               83-72

Maqedoni – Gjeorgji                        75-90

Holandë – Kroaci                             72-78

Grupi D

(Riga – Letoni)

Belgjikë – Republika Çeke             64-66

Letoni – Ukrainë                              74-75

Lituani – Estoni                                64-62