ASNN – Në një atmosferë elektrizuese është pritur ndeshja e shumëpritur Shqipëri-Zvicër. Në sheshin “Nënë Tereza” në një ekran gjigant të gjithë tifozët e pranishëm kanë shijuar emocionet e kësaj ndeshje. Në Lens dhe në Tiranë përcillen emocionet e para teksa këndohet himni kombëtar.
Sheshi “Nënë Tereza” vishet kuqezi. dhjetëra tifozë kanë mbushur sheshin për të parë debutimin e kuqezinjve në Euro 2016. Tifozë të veshur kuqezi, me simbolet e kombëtares, flamuj kuqezi që valëviten kudo. Të gjithë brohorasin për suksesin e arritur nga futbollistët tanë, arritjen në finalet e një aktiviteti të tillë ndërkombëtar.
Në stadiumin e Lensit, dalin futbollistët e të dyja skuadrave, Shqipërisë e Zvicrës. Në Lens dhe në Tiranë këndohet himni i Shqipërisë. Drithërima dhe emocione. Ndërsa të gjithë prisnin vërshëllimën e arbitrit spanjoll Karbajo, për fillimin e ndeshjes Shqipëri-Zvicër, tifozët në sheshin “Nënë tereza” ishin optimistë për rezultatin pozitiv.
Por, 105 minuta më pas… Tepër të zhgënjyer për humbjen e Shqipërisë ndaj Zvicrës, me rezultatin mininal 1-0, kanë qenë tifozët shqiptarë, të cilët e kanë ndjekur këtë sfidë në sheshin “Nënë Tereza”. Keqardhje për ato raste të humbura nga lojtarët tanë. Por besimi në kualifikimin e Kombëtares ekziston ende te të gjithë.
Zhgënjimi për humbjen në ndeshjen e parë në Euro 2016 të Shqipërisë duket në fytyrat e të gjithë tifozëve shqiptarë në “Tirana Fan Zonën” e vendosur në kryeqytet. Keqardhje për rastet e shumta për shënim të humbura nga futbollistët shqiptarë. Por të gjithë kanë besim në shpirtin e garës, egon dhe grintën e futbollistëve kuqezi për të arritur kualifikimin.
