ASNN – Java e 14-të e Kampionatit Kombëtar të Volejbollit për Meshkuj, e zhvilluar këtë të shtunë, dhuroi emocione të forta dhe një ridimensionim të pozitave të pretendentëve, teksa konfirmohet se Erzeni i Shijakut është një ekip që nuk ndalet dhe marshon përpara drejt titullit “kampion”. Natyrisht, nuk është pretendenti i vetëm pasi Partizani, Vllaznia dhe Tirana janë gjithashtu skuadra që kanë pretendimet e tyre.

Por shijakasit kanë një përmirësim të treguesve dhe po shkojnë drejt fundit me plot besim për të arritur maksimumin. Dhe maksimumi është titulli “kampion” i këtij sezoni. Sot skuadra shijakase mund me rezultat të thellë 3-0 Teutën. Ishte një ndeshje stërvitore për Erzenin, i cili me 3 pikët e së shtunës shkon në 36 pikë, 5 më shumë se ndjekësi më i afërt që është Vllaznia.

Shkodranët bënë sot detyrën e tyre në kampionat, duke mundur Elbasanin me rezultatin 3-1 dhe duke marrë një 3-pikësh me vlera. Duhet thënë se shkodranët hasën në vështirësi në këtë përballje, por fitorja e tyre është e merituar dhe ruhet në këtë formë rivaliteti me Erzenin, megjithëse shijakasit ndihen më të fortë në këtë pjesë të dytë të sezonit.

Në kryeqytet, kryendeshja e kësaj jave ishte derbi Tirana-Partizani, e cila përfundoi me fitoren e bardhebluve 3-1. Ishte një nga ndeshjet e bukura të këtij sezoni, me mjaft rivalitet. Në fillim fitoi Tirana, por në setin e dytë ishin të kuqtë që barazuan setet 1-1. Më pas komandën në fushë e ka Tirana, që fiton të dy setet në vijim dhe krejt ndeshjen me rezultatin 3-1.

Me këtë fitore Tirana mban vendin e tretë në renditjen e meshkujve, duke qenë një pretendente për titull kur të luhet faza e “play-off”-it. Ndeshja tjetër e ditës së sotme ishte një tjetër derbi në kryeqytet, ku Studenti u përball me Farka Volej. Fitoi skuadra e Studentit me rezultatin 3-1. Setin e parë e fitoi skuadra e trajnerit Bardhi, por më pas situatën në dorë e mori Studenti, që fitoi 3 sete radhazi, duke e përmbysur ndeshjen dhe duke e fituar atë me rezultatin 3-1.

Kampionati Kombëtar

i Volejbollit – Meshkuj

Java e 14-të, 9 mars 2019:

Farka Volej – Studenti                     1-3

(25-22, 14-25, 22-25, 11-25)

Elbasani – Vllaznia                          1-3

(17-25, 22-25, 25-22, 18-25)

Teuta – Erzeni                                   0-3

(18-25, 9-25, 17-25)

Tirana – Partizani                             3-1

(25-23, 19-25, 25-18, 25-17)

Skënderbeu                                      (pushim)

Renditja

Nr.       Skuadra         N.        F.         H         Pikë

1. Erzeni                        13        12          1        36
2. Vllaznia         12        11          1        31
3. Tirana             13        10          3        30
4. Skënderbeu 12          8          4        25
5. Studenti         13          6          7        18
6. Partizani        12          5          7        16
7. Farka Volej    12          3          9          8
8. Elbasani        13          1        12          4
9. Teuta              12          0        12          0