Skënderbeu do ta ketë shumë të vështirë përballjen e dytë me kampionët e Kroacisë, Dinamon e Zagrebit, sidomos për të pretenduar fitoren. Kjo pamundësi lidhet me mungesat e shumta të skuadrës së trajnerit Mirel Josa në këtë ndeshje, ku mungon ylli i këtij ekipi në këtë periudhë, Bernard Berisha, por edhe sulmuesi me eksperiencë Hamdi Salihi. Diferencat në cilësi midis dy skuadrave janë të ndjeshme dhe Dinamo është dukshëm më e favorizuar, mbi të gjitha nga qetësia që i krijon fitorja e ndeshjes së parë.
Duke iu referuar pikërisht ndeshjes së parë, konstatohet lehtë se përgatitja fizike dhe teknike e lojtarëve të Dinamos është më e mirë. Përveç kësaj, kroatët kanë përvojë më shumë në Kupat e Evropës dhe do të kenë mbështetjen e publikut. Avantazhi i vetëm i Skënderbeut në këtë ndeshje lidhet me faktin se grupi nuk ka çfarë të humbasë tjetër, përveçse të provojë të pamundurën. Kjo e bën ekipin të jetë më i lirshëm në fushë dhe të verë nën presion kundërshtarin.
Mënyra e vetme e Skënderbeut për të marrë rezultat pozitiv do të jetë klasikja “mbrojtje-kundërsulm”, duke qenë se ballafaqimi frontal dhe me lojë të mirëfilltë sulmuese është gati i pamundur të realizohet nga korçarët. Shanset e Skënderbeut rriten ndjeshëm dhe mund të shpresojë edhe për përmbysje nëse realizon shpejt golin. Shanset më të mëdha janë që ta çojë lojën në shtesë me fitore 2-1. Në të kundërt do t’i duhet të mbrohet për të marrë një barazim, që do të ishte, gjithashtu, rezultat shumë i mirë.
Personalisht mendoj se Skënderbeu duhet të sulmojë, pavarësisht rezultatit dhe rrezikshmërisë. Në fund të fundit, Liga e Evropës është siguruar dhe kampionët tanë nuk kanë çfarë humbasin nga kjo sfidë. Angazhimi i Prognit dhe Ndikumanës në një pozicion më sulmues e favorizon këtë dhe vetë trajneri Mirel Josa shquhet për trajner që aplikon lojën shpërthyese.
Problemi më i madh i Josës në këtë ndeshje është se ka pak alternativa në dispozicion dhe kjo është shqetësuese. Sidoqoftë, janë 90 minuta në dispozicion dhe, në fund, në futboll gjithçka mund të ndodhë dhe Skënderbeu ka dhënë prova gjatë këtyre javëve se edhe atë që duket e pamundur mund ta bëjë realitet.
