ASNN – Sportisti premtues i Arteve të Përziera Marciale apo “Mixed Martial Arts” (MMA), Manuel Gaxhja, ka hedhur ditët e fundit një hap të rëndësishëm në karrierën e tij, teksa ka nënshkruar një kontratë profesionale 2-vjeçare, me një kompani ndërkombëtare, “IS 360 Sports & Entertainment”. Kjo kompania ofron marketing sportiv për sportistë të spikatur, duke u siguruar atyre veprimtari madhore, por edhe gjetjen e sponsorëve.

“Dëshiroj të ndaj me ju një arritje shumë të madhe në karrierën time deri më tani, – ka pohuar vetë 19-vjeçari, në një komunikim elektronik me AlbanianSport.com. – Para disa ditësh m’u ofrua kontratë 2-vjeçare profesionale në sportin e MMA-së, nga një kompani menaxhimi që e ka epiqendrën e saj në kryeqytetin e Irlandës. Pasi e shqyrtova këtë kontratë, edhe firmosa. Bashkëpunimi me këtë kompani ka si qëllim arritjen e marrëveshjeve me evenimente të mëdha në botë.”

“Po ashtu, synohen edhe marrëveshje me sponsorë privat, – ka vijuar sportisti shqiptar, duke dhënë për AlbanianSport.com hollësi të tjera të marrëveshjes së nënshkruar me këtë kompani. – Sipas kontratës, nga çdo bashkëpunim, “IS 360 Sports & Entertainment” do të përfitojë 20%, kurse unë 80%. Unë e shoh këtë kontratë si një mundësi të mirë për t’u afirmuar ndërkombëtarisht si sportist, por edhe si një shans të mirë në karrierën time si profesionist.”

Duhet theksuar se në fundtë këtij muaji, shqiptari ka një ndeshje të rëndësishme ndërkombëtare. “Më 25 shkurt 2017 unë ngjitem në kafaz, për t’u ndeshur me 28-vjeçarin Konstantino Kvasilva nga Qipro, – ka deklaruar Manuel Gaxhja. – Aty do përpiqem të ngre lart flamurin shqiptar, por edhe të vazhdoj të ruaj të paprekur rekordin tim profesionist pa humbje.”