ASNN – Gjermanët fitojnë 1-0 në itali dhe sigurojnë vendin në çerekfinale të ligës së Evropës. Veprimtaria e dytë të klubeve të kontinentit, Liga e Evropës, ka luajtur të enjten ndeshjet e kthimit të turit të 16-shes. Takimi më i spikatur ka qenë ai që u soll për sportdashësit drejtpërdrejt nga Rrjeti i Radio-Televizionit Shqiptar. Eintrahti i Frankfurtit ka mundur minimalisht Interin në Itali 1-0 dhe kalon më tej në çerekfinale.
Takimi më i spikatur i ndeshjeve të kthimit të turit të 16-shes Ligës së Evropës ka parë Eintrahtin e Frankfurtit të mundë minimalisht Interin në Itali dhe të kalojë më tej. Në fakt, pjesa e parë e sfidës së luajtur në Stadiumin “San Siro” dhe të sjellë për sportdashësit drejtpërdrejt nga Rrjeti i Radio-Televizionit Shqiptar, ka nisur me gjermanët më agresivë.
Dhe Eintrahti i Frankfurtit ka rrezikuar menjëherë portën e Handanoviçit, që shpëtohet nga shtylla. Megjithatë, presioni i miqve do të japë fryte pas vetëm 6 minutash lojë, kur Joviç do të përfitojë nga pasiguria e mbrojtjes së Interit dhe Joviç do të përshëndesë rrjetën, duke i kaluar gjermanët në epërsi. Goli duket se i ka shtangur italianët, të cilët nuk janë të qartë në ndërtimin e aksioneve të tyre.
Por edhe në finalizimin e rasteve, që, për hir të së vërtetës ishin të paktë dhe të zbehtë. Në krahun tjetër, gjermanët shfrytëzojnë kundërsulmin dhe, në minutën e 27-të, gjejnë edhe një gol të dytë, që për fatin e mirë të Interit, anulohet për pozicion jashtëloje. Me epërsinë njëgolëshe të miqve, që vazhdojnë të rrezikojnë me anë të kundërsulmit, por pa e gjetur sërish rrugën e rrjetës, do të mbyllet pjesa e parë.
Ndërsa e dyta do të ofrojë të njëjtën tablo, me Interin e paqartë dhe të vaktët në ndërtimin e rasteve për shënim, ku shpesh u kufizua vetëm tek goditjet nga jashtë zone, dhe me Eintrahtin e Frankfurtit mjaft efikas në kundërsulm, kur rrezikoi në disa raste të gjente golin, por vetëm Handandoviç i mban zikaltërit në lojë. Mbyllet 1-0 në favor të Eintrahtit të Frankfurtit kjo sfidë ndaj Interit dhe gjermanët sigurojnë vendin në çerekfinale.
