ASNN – Është një nga vendet më të prekura në Evropë dhe në botë nga epidemia e koronavirusit por duket se ditë të mira po vijnë, teksa edhe në Spanjë lejohet rikthimi i ekipeve në stërvitje. Dalëngadalë, armiku i padukshëm po humb fuqinë. Koronavirusi, që i bëri shumë dëme botës prej disa muaj, po dobësohet. Për këtë arsye, pas Italisë, tani edhe Spanja ka vendosur që t’i lejojë ekipet t’i nisin stërvitje.
Por fillimisht ato do të jenë individuale, duke respektuar largësinë e nevojshme, para se të stërviten në grupe në javën e 3-të të majit. Lajmi është konfirmuar nga Ministri spanjoll i Shëndetsisë, Salvador Illa, i cili konfirmoi se, që nga java e ardhshme, futbollistët do të lejohen të shkojnë nëpër qendrat stërvitore të ekipeve. Me pak fjalë, kampionati spanjoll i futbollit, pritet të rikthehet shumë shpejt.
Ministri i Shëndetësisë në Spanjë, Salvador Illa, ka hapur dritën jeshile sa i takon rikthimit të skuadrave në fushat e blerta. Sipas tij, stërvitja individuale nuk ka asnjë rrezik përhapje të virusit, si dhe stërvitjet e plota në grup, nën masat e duhura të higjienës, priten të rikthehen shumë shpejt. “Të hënën, stërvitjet individuale janë të lejuara për klubet profesioniste”, – ka thënë Illa.
“Nën masat e duhura të higjienës, do të lejohen dhe stërvitjet në grupe. Do të rikthehemi gradualisht, duke filluar që të hënën”, – ka shtuar qeveritari spanjoll. Numri i të prekurve, por edhe i personave që po humbin jetën nga koronavirusi në Spanjë ka ardhur në rënie gjatë ditëve të fundit, me situatën që pak nga pak po shkon drejt normalizimit.
Për këtë arsye të gjithë futbollistët nga java e ardhshme, gjithmonë duke respektuar ende rregullat për distancë së paku 2 metra, do t’i rinisin stërvitjet.
