ASNN – Presidenti: “Synojmë vendin e parë në grup dhe të tentojmë kualifikimin në Evropian”. Humbja me Skocinë në Ligën e Kombeve dhe polemikat rreth zgjedhjeve të
Kristian Panuçi nuk i kanë lëkunduar pozitat e tij te Kombëtarja. Presidenti i Federatës Shqiptare të Futbollit, Armand Duka, e thotë këtë qartë në një intervistë dhënë të shtunën për TV Klan.
“Çdo skuadër ka kufizimet e veta, ka fatin e vet dhe do të arrijë një rezultat jo vetëm nga përgatitja dhe paraqitja e skuadrës, por edhe nga fati, kështu që Panuçi duhet të vazhdojë, – ka deklaruar ai, duke folur për televizionin në fjalë. – Kjo është loja, ky është futbolli, duhet të tentosh maksimalisht ta përmirësosh edhe në momentet që me armatën që ke nuk mund ta përmirësosh, atëherë mund të bësh ndryshime.”
Kreu i Federatës së Futbollit mendon se zgjedhjet e deritanishme të trajnerit dhe stafit të tij kanë qenë të drejta. Armand Duka nuk e quan një tragjedi rezultatin e fundit të kuqezinjve, por pohon se duhen korrigjuar problemet. Presidenti i FSHF-së thotë: “Të humbësh një ndeshje me Skocinë nuk do të thotë që duhet të presësh koka, do të thotë që ne duhet të bëjmë analiza.”
“Duhet të kuptojmë se ku i kemi defektet sportive dhe jo të kalojmë në këto emocione luftarake dhe t’i korrigjojmë për të ardhmen”, – shprehet presidenti Duka. Ndërkohë, ai ka sidoqoftë, edhe një vërejtje miqësore ndaj Kristian Panuçit. “Është komunikimi me publikun dhe median, por jo vetëm ai, por edhe stafit të FSHF-së”, – thotë kreu i organizmit që qeveris futbollin në vend.
Shqipëria ka 3 pikë deri më tani dhe ka ende në dispozicion edhe 6 të tjera. Edhe pse është e vështirë në grupin ku ndodhet Armand Duka thotë se synimi final nuk ndryshon. “Ne nuk lëvizim nga objektivi jonë për të qenë të parët e grupit dhe për të tentuar një kualifikim në Evropian edhe nga kjo mundësi”, – thekson presidenti i FSHF-së, Armand Duka.
Pjesëmarrja e Kombëtares në fazën finale të “Euro 2016” ishte një eveniment historik për futbollin shqiptar, një arritje që kërkohet sërish nga tifozeria dhe opinioni sportiv. “Në fakt, po ta themi paksa me humor, është faji i vetë skuadrës, pasi ishte ajo që e ngriti stekën, që tani është aq lart dhe të gjithë presin nga Kombëtarja”, – e përmbyll Armand Duka.
