ASNN – Intervista për “SportItalia”, Presidenti Duka: “Asllani, një Modriç i vogël. Presim Kumbullën, Gjimshiti, një lider.” Dëmtimi që detyroi mesfushorin turk, Hakan Çalhanollu, të mungonte në 3 ndeshjet e fundit të Interit fillimisht i kishte shqetësuar jo pak tifozët zikaltër.

Ndalesa e tij, megjithatë, kishte anën pozitive të medaljes: Kristjan Asllani, i thirrur për ta zëvendësuar, pati shansin të luante si titullar në disa ndeshje delikate, me Leçen, Atalantën dhe Xhenoan, duke dhuruar paraqitje tejet pozitive dhe duke gjetur madje golin të hënën e kaluar, i pari për të në Serie A me fanellën zikaltër.

Presidenti i Federatës Shqiptare të Futbollit, Armand Duka, ka dhënë një intervistë për median italiane “SPORTITALIA” ku ka folur për yllin shqiptar të Interit, si dhe rikthimin në fushë pas dëmtimit të gjatë të Marash Kumbullës dhe lojtarit të preferuar te Gasperinit tek Atalanta, Berat Gjimshiti.

Kjo është pjesa e 3-të dhe e fundit e intervistës së presidentit të FSHF-së, Armand Duka, për median italiane në fjalë, që AlbanianSport.com ua solli në 3 pjesë.

– Në finalet e “Euro 2024”-ës, Shqipëria është në një grup me Italinë, Kroacinë dhe Spanjën. A mund t’i befasojë të gjithë?

– Para së gjithash, Shqipëria duhet ta shijojë në maksimum këtë pjesëmarrje në finalet e “Euro 2024”-ës. Lojtarët dhe stafi teknik kanë bërë një punë të shkëlqyer në fushatën kualifikuese dhe e kanë merituar plotësisht këtë sukses. Thënë kjo, ne shkojmë në “Euro 2024” për të bërë maksimumin dhe për të sfiduar çdo kundërshtar, pavarësisht së përballë kemi emra të mëdhenj të futbollit botëror. Nëse shkon në finalet e një turneu të madh është normale që të ndeshesh me më të fortët.

– Sa shanse sheh për Shqipërinë në këtë grup?

– Shorti na ka vënë përballë ish-kampionëve të botës dhe të Evropës, Italisë dhe Spanjës, por edhe Krocisë, gjithashtu një emër i madh. Është e kotë të flasësh për forcën e këtyre kundërshtarëve, historia e tyre dëshmon qartë se kush janë. Por unë besoj se ne kemi një skuadër të mirë, kemi shumë cilësi dhe i kemi mundësitë për të tentuar kalimin e grupit. Në futboll surprizat janë të zakonshme tashmë dhe nuk do të ishte çudi nëse Shqipëria kalon grupin. Uroj të kemi të gjithë lojtarët në dispozicion, të jenë në formë të mirë dhe të mos kemi dëmtime. Një gjë është e sigurt: lojtarët do të jenë të karikuar në maksimum për të bërë mirë në këtë turne. Do të kemi dhe mbështetjen e pakursyer të tifozëve tanë fantastikë, të cilët do t’i veshin stadiumet me ngjyrat kuqezi dhe do ta motivojnë shumë Kombëtaren në fushë, ashtu siç bënë edhe në “Euro 2016”.