ASNN – Presidenti i Federatës Shqiptare të Futbollit, Armand Duka i ka dërguar një telegram ngushëllimi Presidentit të Federatës Kroate të Futbollit, Davor Shuker, me rastin e ndarjes nga jeta të ish-futbollistit dhe ish-trajnerit të njohur kroat, Zllatko Kranjçar.
Në mesazhin e tij, kreu i organizmit që qeveris futbollin shqiptar ka vlerësuar kontributin e madh që Kranjçari, një personalitet i madh i futbollit dhe i trajningut kroat, ka dhënë për futbollin dhe i shpreh ngushëllimet më të sinqerta familjes Krancjar dhe komunitetit kroat të futbollit.
“I dashur President, i dashur Davor! – shkruan Duka në mesazhin e tij. – U trishtuam shumë kur morëm lajmin e ndarjes së papritur nga jeta të Zllatko Kranjçar, një trajner mjaft i talentuar futbolli, që ka dhënë një kontribut të madh për këtë sport. Në emër të Federatës Shqiptare të Futbollit, dua t’i shpreh ngushëllimet më të sinqerta familjes Kranjçar, Federatës Kroate të Futbollit dhe komunitetit kroat të futbollit.”
Zllatko Kranjçar u nda nga jeta këtë të hënë në kryeqytetin e Kroacisë, Zagreb, pasi nuk mundi të fitojë dot betejën me një sëmundje të rëndë. Ai e kishte nisur karrierën si futbollist i Dinamos së Zagrebit në fillim të viteve 1970 dhe gjatë karrierës së tij ka luajtur me shumë klube.
Gjithashtu, Kranjçari ka luajtur edhe me përfaqësuesen e ish-Jugosllavisë e më pas me Kroacinë, pas shpalljes së pavarësisë. Në karrierën e tij të pasur ai ka drejtuar përfaqësuesen e Kroacisë në fazën finale të Botërorit 2006 e më pas shumë klube në të gjithë botën.
