ASNN – Policia ka shprehur shqetësim për ndeshjen e 8 tetorit midis Shqipërisë dhe Serbisë në Stadiumin “Elbasan Arena”, pasi, edhe pse ka nën kontroll gjithçka, duket se jashtë perimetrit të saj të sigurisë janë pikërisht ballkonet e pallateve pranë impiantit në Elbasan, të cilat mbushen me tifozë gjatë orarit të ndeshjes.
Nuk është hera e parë që ndodh, pasi ballkonet shfrytëzohen shpesh tek ne për të parë ndeshjen. Por për policinë ky është problem, pasi i ka jashtë kontrollit të saj. Referuar të
dhënave që vijnë nga policia, po mendohet një plan masash për të kontrolluar individët që do të jenë nëpër ballkone, por ky konsiderohet si një mision shumë i vështirë.
Ndeshja me Serbinë po afron ndërsa në qytetin e Elbasanit kanë nisur përgatitjet për këtë sfidë. Për vetë rrjedhën e ngjarjeve në të kaluarën, por edhe për çështjen e kualifikimit, ndeshja Shqipëri-Serbi cilësohet si më e rëndësishmja në fushatën Eliminatore të “Euro 2016”-tës.
Në Elbasan, këto ditë më shumë se ndeshjen, flitet për sigurinë dhe masat që do të merren për shmangien e incidenteve. Federata Shqiptare e Futbollit ka shtuar kontaktet me Policinë e Shtetit, por edhe me Shërbimin Informativ. Po ashtu edhe UEFA është vënë në lëvizje për mbarëvajtjen e sfidës së 8 tetorit 2015.
Në masat e sigurisë që do të jenë më të forta se në çdo takim tjetër të luajtur në “Elbasan Arena”, shqetësim mbeten pallatet dhe ndërtesat e tjera rreth stadiumit. Banorët tregojnë se në përballjet e shkuara mjaft qytetarë vendas e të huaj e kanë ndjekur takimin nga ballkonet e apartamenteve të tyre.
Madje në disa raste pronarët i kanë lëshuar ballkonet edhe me qera. Por në ndeshjen e ardhshme gjërat ndryshojnë. Banorët shprehen se nuk do të lejojnë persona të tjerë që të futen në pallat. Policia ka kontaktuar me të gjithë banorët, ka kryer verifikimet përkatëse dhe do të ketë në kontroll këto ndërtesa gjatë ditës së ndeshjes Shqipëri-Serbi.
