ASNN – Serbia është detyruar të pranojë kërkesën e Federatës Shqiptare të Futbollit për të rezervuar numrin përkatës të biletave të ndeshjes së 14 tetorit mes dy vendeve për tifozët shqiptarë. Edhe pse kërkesa e saj ka qenë që të dyja eliminatoret mes Serbisë dhe Shqipërisë të luhen pa praninë e tifozëve miq, në fund ka triumfuar rregullorja përkatëse e UEFA-s, së cilës nuk mund t’i shmanget askush. Kësisoj, tifozët shqiptarë do të kenë mundësinë ta përkrahin kombëtaren kuqezi në Beograd, vetëm se do të kalojnë nëpër një “skaner” të hollësishëm kontrolli para se të hyjnë në stadium, ndërkohë që pala serbe do të kërkojë informacion personal për çdo posedues bilete.

Për çdo incident apo shqetësim që do të ketë lidhje me tifozët shqiptarë, Serbia thotë se do të bëjë përgjegjëse FSHF-në. Ja edhe deklarata e plotë e Federatës Serbe të Futbollit, e postuar në faqen zyrtare të FSF-së në Internet:

“Federata Serbe e Futbollit ka marrë një përgjigje nga homologia e saj shqiptare, dalë nga mbledhja e Komitetit Ekzekutiv të federatës në këtë vend, ku thuhet se ata nuk e pranojnë propozimin tonë që dy ndeshjet kualifikuese për Kampionatin Europian 2016 t’i luajnë pa praninë e tifozëve udhëtues, kjo e bazuar vetëm në arsyet e organizimit sa më të mirë të të dyja takimeve. Edhe pse është praktikë e zakonshme për t’iu rezervuar tifozëve miq biletat e kërkuara (deri në pesë për qind të kapacitetit të stadiumit), Federata Serbe e Futbollit dëshiron të tregojë vullnetin e mirë dhe gatishmërinë për organizimin sa më të mirë të lojërave të ardhshme. Në këtë mënyrë, ne do të sigurojmë kontigjentin e parashikuar të biletave dhe do ta vëmë atë në dispozicion të tifozëve të Shqipërisë. Prandaj, parimi i njëjtë duhet të zbatohet edhe gjatë vizitës së ekipit tonë në Shqipëri, më 8 tetor 2015.

Vendimi për sjelljen e tifozëve të tyre në ndeshjen Beograd, për të ndjekur ndeshjen Serbi-Shqipëri, do të thotë se Federata e Futbollit të këtij vendi merr përgjegjësinë e plotë për sjelljen e tifozëve të saj. Në mënyrë që të përputhen në mënyrë adekuate masat organizative të Federatës Serbe të Futbollit me legjislacionin e Republikës së Serbisë, do të kërkojmë nga Shqipëria që për çdo posedues bilete të na japë informacion personal. Ditën e ndeshjes do të vazhdojmë të kemi bashkëpunim të ngushtë me autoritetet shtetërore në lidhje me organizimin e duhur të ndeshjes Serbi-Shqipëri, të sigurt se së bashku do të kemi mundësi për të bërë çdo gjë në mënyrën më të mirë të mundshme.

Federata e Serbisë është e bindur se ndeshja e ardhshme midis Serbisë dhe Shqipërisë do të kalojë në mënyrën më të mirë të mundshme. Vizitorët nga Shqipëria do t’i mirëpresim në vendin tonë, ndërsa nxisim të gjithë tifozët tanë për ta përkrahur fuqishëm kombëtaren, gjithnjë në frymën e të luajturit drejt. Së bashku t’i ndihmojmë lojtarët e ekipit kombëtar në rrugën e arritjes së fitoreve të rëndësishme.”