ASNN – Gjatë një konference për shtyp në mbyllje të sesionit të 128-të të Komitetit Olimpik Ndërkombëtar (IOC), të mbajtur në kryeqytetin e Malajzisë, në Kuala Lumpur, Presidenti i Komitetit Olimpik Ndërkombëtar, Tomas Bah, CIO-s, ka garantuar tolerancë zero ndaj të gjithë atyre që kanë përdorur doping në marrjen e medaljeve. Sipas një hetimi të bërë nga gazeta britanike “Sandej Tajms”, nga rreth 5,000 atletë është zbuluar një “shkallë e jashtëzakonshme e mashtrimit”. Të dhënat i takojnë Federatës Botërore të Atletikës (IAAF).
“Hëpërhë, ne nuk kemi asgjë më shumë se akuzat dhe duhet të respektojmë prezumimin e pafajësisë, – theksoi Bahu. – Nëse do të konstatohen raste që përfshijnë rezultatet në Lojërat Olimpike, Komiteti Olimpik Ndërkombëtar do të veprojë me zero tolerancë.” Vetëm dy ditë më parë, doli pretendimi se niveli i mashtrimit në Lojrat Olimpike duhet të jetë alarmues. Ky është përfundimi që del pas publikimit të analizave të gjakut të 5 000 atletëve, pjesëmarrës në Olimpiada dhe Botërorë, që nga viti 2001 deri më sot.
Televizioni gjerman, ARD/VDR dhe gazeta britanike, “Sandej Tajms” informuan se, nga këto analiza besohet që një e treta e medaljeve të fituara nëpër turnetë e mëdhenj në 15 vitet e fundit, në garat e rezistencës, është e dyshimtë. Më shumë se 800 atletë kanë teste gjaku që mund t’i quajnë si marrës të dopingut, ose që minimalisht mund të quhen jonormale, por asnjërit prej këtyre atletëve nuk i është hequr medalja. Dokumentet i përkasin Federatës Botërore të Atletikës, por nuk ishin në dijeni të Agjencisë Botërore të Antidopingut, dhe u nxorrën për mediat nga një njeri i brendshëm.
Presidenti i Agjencisë Botërore të Antidopingut (WADA), Sër Krejg Ridi, i quajti këto dyshime si tepër shqetësuese. Rusia është shteti mbi të cilin bien më shumë dyshime, sipas mediave, pasi sipas tyre, 80 për qind e medaljeve të fituara nga ajo mund të quhen të dyshimta. Kenia vjen pas rusëve, me 18 medalje që mund të jenë fituar në mënyrë mashtruese, ndërsa besohet se 10 medalje të paktën në Lojrat e fundit Olimpike në Londër, duhet të jenë të tilla. Ylli i madh i sportit, Jusein Bolt, ka dalë me analiza gjaku normale, ashtu si edhe atleti i shquar britanik, Mohamed Farah.
