Domosdova merr goditjen e radhës, por këtë javë jo nga ekipi kundërshtar, por nga forcat e policisë që refuzuan të merrnin përsipër mbarëvajtjen e ndeshjes, pasi e cilësuan përballjen me Olimpikun si të rrezikshme. Shanset janë të shumta që Domosdova ta humbasë ndeshjen në “tavolinë”.

Kontradiktore në këtë rast është se nga FSHF ishte dhënë miratimi, apo licenca, që ndeshjet mund të zhvilloheshin edhe në fushën e Përrenjasit. Por komisariati i këtij qyteti vendosi që ndeshja të anulohej. Në këtë ndeshje, që shpresohej të zhvillohej në qytetin e tyre, ekipi shpresonte se do të vinte kthesa dhe marrja e rezultateve pozitive.

Por sërisht pa fat, pasi nuk arriti ta zhvillonte fare ndeshjen. Tashmë ekipi është në krizë totale rezultatesh dhe shpresa për të marrë pikë duket akoma shumë larg. Trajneri Lulëzim Rira shprehet se ndeshja me Olimpikun është mohuar në mënyrë të padrejtë nga forcat e rendit.

“Nuk kishte asnjë faktor të rrezikshëm nga i cili t’i linim shkak policisë të na refuzonte. Na u mohuan 3 pikë ose në rast barazimi një pikë, – ka theksuar kreu i skuadrës prrenjake. – E kjo në mënyrë ta padrejtë pasi ndeshja duhej të zhvillohej dhe ta kishin në dorë ekipet për rezultatin.”

“Shpresojmë që gjërat të sqarohen sa më shpejt dhe të mos hasim më pengesa”, ka përfunduar trajneri Lulëzim Rira me keqardhje, por aktualisht Domosdova vazhdon të mbetet në kuotën e zero pikëve edhe pse javët kalojnë.