ASNN – Përjashtohen dy skuadra të Pogradecit, ndëshkohet edhe Apolonia dhe zyrtari i Laçit. Komisioni i Disiplinës pranë Federatës Shqiptare të Futbollit ka zhvilluar të mërkurën mbledhjen e radhës ku ka marrë në shqyrtim ngjarjet e ndodhura në të gjitha nivelet e Kampionatit Kombëtar të Futbollit për të rritur, por atë të grupmoshave. Kështu, për sjellje të gabuar të lojtarëve, në bazë të Kodit të Disiplinës Sportive, Apolonia dënohet me gjobë në masën 200.000 (njëqind mijë) lekë.

Po kështu, klubi fierak urdhërohet të dëmshpërblejë, brenda 15 ditëve, dëmet e shkaktuara në dhomat e zhveshjes në Stadiumin “Elbasan Arena” sipas akt konstatimit. Ndërkaq, zyrtari i Laçit, Naim Halilaj, për sjellje josportive ndaj zyrtarit të ndeshjes, dënohet me 10 ndeshje pezullim nga aktiviteti. Në zbatim të nenit 19 të Kodit të Disiplinës Sportive, zyrtarit i ndalohet qëndrimi në dhomat e zhveshjes, stolin e rezervave dhe mjedisin përreth fushës.

Disiplina ka vendosur ndërkohë pranimin e kërkesës së lojtarit të KF Turbina, Dorjan Bajrami, duke pezulluar zbatimin e pjesës së mbetur të dënimit, por lojtari vendoset në provë për një afat 6-mujor dhe në rast të përsëritjes të shkeljes disiplinore gjatë periudhës së provës, dënimi i pezulluar i shtohet dënimit të ri. Në vijim Disiplina ka vendosur rrëzimin e kërkesës së lojtarit të Vorës, Segerso Geci, por edhe atë të lojtarit të Shkumbini, Daniel Ramazani, si të pabazuar në Kodin e Disiplinës Sportive.

Vendimet e tjera të Komisionit të Disiplinës kanë të bëjnë me skuadrat e moshave, aty ku spikat përjashtimi nga gara për sezonin aktual dhe atë pasardhës, si të skuadrës së Nën-17-vjeçarëve, ashtu edhe atë të Nën-19-vjeçarëve të Pogradecit, për shkak të mosparaqitjes së tyre përkatësisht në përballjet me Vorën dhe Besën.

Vendimet e Komisionit të Disiplinës së FSHF datë 13.01.2021:

1. FK Apolonia, për sjellje të gabuar të lojtarëve, në bazë të neneve 64/1, 64/4 dhe 64/5 të KDS, dënohet me gjobë në masën 200.000 (njëqind mijë) lekë. FK Apolonia, urdhërohet të dëmshpërblejë dëmet e shkaktuara në dhomat e zhveshjes në Stadiumin “Elbasan Arena” sipas akt konstatimit, brenda 15 ditëve.
2. Zyrtari i KF Laçi, Naim Halilaj, për sjellje josportive ndaj zyrtarit të ndeshjes, në bazë të nenit 48/2/a të KDS, dënohet me 10 (dhjetë) ndeshje pezullim nga aktiviteti. Në zbatim të nenit 19 të KDS, zyrtarit i ndalohet qëndrimi në dhomat e zhveshjes, stolin e rezervave dhe ambientin përreth fushës.
3. KF Pogradeci U-17, për braktisjen e ndeshjes së vlefshme për turin 1/16 të Kupës së Shqipërisë, kundër Vora U-17, në bazë të nenit 54/1 të KDS dhe nenit 30/2 të Rregullores së Veprimtarisë Futbollistike, humbet ndeshjen në tavolinë me rezultatin 3-0 dhe përjashtohet nga gara për sezonin aktual si dhe atë pasardhës të Kupës së Shqipërisë.
4. KF Pogradeci U-19, për braktisjen e ndeshjes së vlefshme për turin 1/16 të Kupës së Shqipërisë, kundër FC Besa U-19, në bazë të nenit 54/1 të KDS dhe nenit 30/2 të Rregullores së Veprimtarisë Futbollistike, humbet ndeshjen në tavolinë me rezultatin 3-0 dhe përjashtohet nga gara për sezonin aktual si dhe atë pasardhës të Kupës së Shqipërisë.
5. Lojtari i Durrësi 04 U-19, Biorni Elezi, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
6. Lojtari i KF Shkodra U-19, Alfred Kacaj, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
7. Lojtari i Durrësi 04 U-19, Mateo Hasibra, për sulm ndaj kundërshtarit, në bazë të nenit 47/1/e të KDS, dënohet me 5 (pesë) ndeshje pezullim nga aktiviteti.
8. Lojtari i Iliria U-19, Sebastian Cela, për sjellje josportive ndaj zyrtarit të ndeshjes, në bazë të nenit 48/1/a të KDS, dënohet me 10 (dhjetë) ndeshje pezullim nga aktiviteti.
9. Lojtari i Iliria U-19, Ernik Paloka, për sjellje josportive ndaj zyrtarit të ndeshjes, në bazë të nenit 48/1/a të KDS, dënohet me 8 (tetë) ndeshje pezullim nga aktiviteti.
10. Lojtari i Iliria U-19, Robert Mesi, për lojë të rendë ndaj kundërshtarit, në bazë të nenit 47/1/b të KDS, dënohet me 2 (dy) ndeshje pezullim nga aktiviteti.
11. Pranimin e kërkesës së lojtarit të KF Turbina, Dorjan Bajrami, duke pezulluar zbatimin e pjesës së mbetur të dënimit. Në bazë të nenit 32/2/4/5 të KDS, lojtari vendoset në provë për një afat 6 (gjashtë) mujor dhe në rast të përsëritjes të shkeljes disiplinore gjatë periudhës së provës, dënimi i pezulluar i shtohet dënimit të ri.
12. Rrëzimin e kërkesës së lojtarit të Vora, Segerso Geci, si të pabazuar në Kodin e Disiplinës Sportive.
13. Rrëzimin e kërkesës së KF Shkumbini, Daniel Ramazani, si të pabazuar në Kodin e Disiplinës Sportive.