ASNN – Trajneri i Dinamos së Zagrebit, Zoran Mamiç, tha pas takimit se ekipi i tij e meritoi fitoren dhe pati më shumë raste se Skënderbeu, por kujtoi e kërkohet kujdes për sfidën e kthimit. Ai përgëzoi publikun e në të njëjtën kohë Skënderbeun për shpirtin e garës.
Pas ndeshjes, trajneri i gjigantes së futbollit kroat ka deklaruar se është shumë i kënaqur me paraqitjen e ekipit të tij dhe thekson se skuadra e tij tashmë është shumë pranë kualifikimit. “Fillimisht dua të uroj futbollistët për fitoren pasi luajtën me shpirt”, – tha ai gjatë konferencës për shtyp pas ndeshjes.
“Zhvilluam një ndeshje mjaft të mirë dhe dominuam në 90 minuta, – vijoi Mamiç. -Skënderbeu na vuri në vështirësi në disa momente të veçanta sidomos në rastin e golit që erdhi falë një episodi. Megjithatë ne ditëm të reagojmë dhe arritëm të përmbysim rezultatin.”
“Jam shumë i kënaqur me rezultatin dhe mund të them se jemi shumë pranë kualifikimit. Normalisht që e vlerësojmë maksimalisht edhe ndeshjen e kthimit dhe do të motivohëmi për të dhenë akoma më tepër sesa sot”, – ka përfunduar trajneri i Dinamos së Zagrebit, Zoran Mamiç, duke folur pas ndeshjes.
